O PSdeG reclama á Xunta que mostre o seu apoio público á futbolista que non participou nunha homenaxe a Maradona

A portavoz de Igualdade do Grupo Parlamentario Socialista, Noa Díaz, rexistrou unha serie de iniciativas na Cámara galega nas que pide que a Xunta mostre o seu apoio público á xogadora de fútbol galega que se negou a participar nun minuto de silencio en memoria de Maradona como acto de reivindicación feminista.

Nas iniciativas, das que informou nun comunicado, a deputada do PSdeG tamén reclama que o Goberno galego condene as ameazas que esta xogadora do Viaxes Interrías Fútbol Feminino está a sufrir a consecuencia da súa acción.

Noa Díaz pídelle á Xunta que recoñeza a súa "acción de valentía e en favor da igualdade", ademais de condenar todas as ameazas que "leva sufrindo a consecuencia" da súa acción. "Os pequenos xestos moven o mundo, e esta moza pontevedresa deu unha gran lección a toda a sociedade, rexeitando co seu xesto que os privilexios de ser unha lenda do fútbol estean por encima das violencias machistas".

"Non se poden consentir os discursos do odio e fanatismo nunha sociedade que queremos igualitaria, e na que cada quen deberá poder expresarse libremente, máximo cando a súa reivindicación pon o foco na violencia contra as mulleres", asegura a parlamentaria.

Paula Dapena durante o minuto de silencio a Maradona | Fonte: Twitter