Verto, Ortiga ou Tanxugueiras poñerán música ao Nadal compostelán
O Mercado da Estrela volve a Santiago con novos espazos e unha ampla programación musical.
Por E.P. | SANTIAGO DE COMPOSTELA | 09/12/2020 | Actualizada ás 17:16
O concelleiro de Festas de Santiago de Compostela, Gonzalo Muíños, e a directora do Mercado da Estrela, Mónica Mejias, deron conta este mércores da nova edición desta iniciativa, que se celebrará os días 18, 19 e 20 de decembro coa inclusión de novos espazos e unha ampla programación musical.
A pesar das circunstancias actuais, o Mercado da Estrela volverá mostrar a creatividade e novas tendencias do deseño galego por noveno ano consecutivo, difundindo o traballo de máis de medio centenar de persoas creadoras, artesás, artistas, produtoras e emprendedoras de Galicia.
Os espazos seleccionados para este 2020 son o claustro procesional e a hospedaría de San Martiño Pinario, na praza da Inmaculada, e o edificio do Antigo Consistorio, situado na compostelá Praza de Cervantes. A entrada será gratuíta para os visitantes que se acheguen a este tres zonas da Feira Creativa.
Complementarán o programa para esta 9ª edición unha ampla programación musical que se celebrará baixo a premisa de #culturasegura na pista cuberta dos xardíns do Centro Don Bosco, na rúa Belvís.
Serán o concerto de The Sey Sisters en colaboración co Outono Códax Festival e a actuación de Familia Caamagno o venres 18; a presentación do filme ONS coa presenza do equipo da película e do seu director, Alfonso Zarauza, Premio Cineuropa 2020 e a música da banda Chicharrón, a actuación de Tanxugueiras e Terbutalina en directo o sábado 19; e os concertos da Orquestra Exploratoria de San Pedro, Verto e Ortiga o domingo 20 de decembro.
As entradas para os concertos están vendidas practicamente na súa totalidade, aínda que é posible aínda adquirir tíckets para os concertos de The Sey Sisters, Familia Caamagno, Tanxugueiras e Ortiga.
O horario da Feira Creativa do Mercado da Estrela será de 16,00 a 21,00 horas o venres 18, e de 11,00 a 21,00 horas, en horario ininterrompido, o sábado 19 e o domingo 20 de decembro.
