(Vídeo) "Marcas galegas, por que ignorades aos nosos creadores de contido?". A viral pregunta dun 'tiktoker' galego

Lucas é un creador de contido en galego que triunfa actualmente en Tik Tok (@lucasreyy_) --con máis de 20.500 seguidores-- e que, ademais de facernos rir a esgalla co seu humor afiado, tamén solta verdades coma puños. Sen ir máis lonxe, recentemente, denunciou a falta de apoio das marcas galegas aos creadores de contido da súa propia terra. Mentres noutras partes do mundo as empresas locais apostan polos creadores autóctonos para promocionar os seus produtos, en Galicia semella que miran para outro lado. Nun momento no que as redes sociais son clave para conectar co público, como é posible que as empresas de Galicia continúen ignorando a aqueles que difunden a cultura e a identidade galegas? É desinterese, falta de visión ou simplemente unha cuestión de prexuízos? Galicia Confidencial fala con este rapaz que aos seus 21 anos foi quen de poñer no seu sitio a moitas empresas que logo din defender a marca 'Galicia' cando á hora da verdade fan todo o contrario. Aínda que Lucas, nas súas redes, non só ofrece entretemento, senón que tamén derivou cara un contido máis divulgativo mediante o que dá a coñecer curiosidades dos concellos galegos.

Os comezos de Lucas nas redes sociais foron moi diferentes ao contido que ofrece na actualidade. "Eu comecei facendo vídeos de cociña para a xente, porque sabía de primeira man que había moitos universitarios que estaban estudando en pisos e que non saían da pasta con tomate todos os días, polo que eu quería ofrecerlles certa variedade, con receitas sinxelas de facer e baratas", conta este rapaz. Á xente foille gustando máis e máis o seu contido e rematou por facerse viral con varias das súas propostas. A súa 'fama' chegou a oídos da TVG e chamáronno para participar como cociñeiro no programa 'Quen anda aí?', con Roberto Vilar. Pero como se deron conta de que Lucas era un retranqueiro de pura cepa e que lle saía o humor polos cóbados, seguírono chamando máis a miúdo. Así, tamén colaborou na mesa de tertulias do programa 'Laretando' con outros convidados. A raíz desas participacións en televisión, e vendo que gustaba o seu humor, decidiu dar un xiro tamén ás súas redes.

"SON PLENAMENTE CONSCIENTE DE QUE NAS REDES SOCIAIS HAI QUE SER DIFERENTE, DINÁMICO E BUSCAR O ENTRETEMENTO INNOVANDO"

"Empecei a facer vídeos máis de humor e vin que a xente respostaba ben, gustábanlles", resalta. A iso sumou tamén a creación de vídeos cun contido máis reivindicativo sobre a defensa da lingua galega e tamén das nosas tradicións. A maiores, "tamén ía sacando de cando en cando á palestra temas máis dinámicos e polémicos, por exemplo expoñendo a supostos 'influencers' que se metían co galego, ou comidistas que dicían que os percebes asturianos eran mellores que os galegos", entre moitos outros temas. Pero para Lucas aínda non era suficiente con todo este contido, e quixo dar outro paso máis: "Púxenme a pensar máis ideas, porque son plenamente consciente de que nas redes sociais hai que ser diferente, dinámico e buscar o entretemento innovando". Así, partindo da idea de dous dos seus amigos, Lucas e Pedro, que contaban nas redes curiosidades sobre os concellos galegos situándoos nun mapa mural que puxeron na casa, Lucas optou por "convidalos a saír á rúa con mapas, cunha lousa e facer coma unha especie de concurso". "A xente tiña que sacar dunha bóla quente os nomes dos concellos e situalos no mapa a cambio dun pequeno agasallo", conta.

Foi así como comezou a creación de contido de carácter máis divulgativo. Contido que, contra o que poida pensarse, está resultando todo un éxito. "A verdade é que estes vídeos foron toda unha revolución, acadando xa millóns de visitas en total", afirma, asegurando que agora o que está a facer é "nomear concellos diferentes en cada vídeo, para dalos a coñecer a todos e que poidan chegar a todo o mundo". Ademais, hai veces nas que tamén crea vídeos de 'top 5', como por exemplo, 'top 5' concellos galegos para ligar ou 'top 5' concellos galegos para saír de festa, que lle aportan á súa canle de Tik Tok un ton moito máis dinámico e variado. E, se ata o dagora lle estaba dando a maior parte do protagonismo aos entrevistados, saíndo el en pantalla o mínimo posible, a partir dagora pretende "introducir tamén o toque de humor nas entrevistas".

"ESTOU MOI CANSO DE FACER CONTIDO EN GALEGO, REPRESENTANDO Á NOSA TERRA, E QUE AS MARCAS QUE SON DELA TEÑAN XESTOS IRRESPECTUOSOS"

Con todo, e a pesar de que practicamente a totalidade de vídeos que sube Lucas ás redes tardan minutos en facerse virais, acadando máis de 100.000 visitas, con algúns que superan as 200.000, con 10 millóns de visualizacións sumando todo o seu contido, denuncia que houbo marcas galegas de diversos produtos que rexeitaron ou, directamente, nin contestaron, ás súas peticións de colaboración. Este mozo dáballes a idea de poder empregar produtos destas marcas como agasallo nas entrevistas que realizaba a pé de rúa, pero algunhas deixáronno en visto. "Cando comezamos a facer os vídeos mercabamos nós os produtos, cousas baratas, como unhas galletas, por exemplo", sinala. Sen embargo, "como os vídeos xa acadaron unha certa repercusión e son bastante vistos, pensamos que habería marcas galegas ás que lle puidese interesar sumarse ao noso proxecto", de tal maneira que, "en lugar de agasallar aos entrevistados cunhas galletas Chips-Ahoy, puidésemos darlle unhas galletas mariñeiras feitas en Galicia. "Cal foi a miña sorpresa cando falei coa marca destas galletas mariñeiras e non me contesta, falo con Larsa e déixame a mensaxe en lido...", conta.

"Aí foi realmente cando me empecei a dar conta do que estaba sucedendo", sinala, asegurando que foi por ese abrir de ollos cando "me decidín a facer un vídeo contando que estou moi canso de facer contido en galego, representando á nosa terra, e que as marcas que son dela teñen ese tipo de xestos irrespectuosos, porque non costa nada ter un detalle ou, alo menos, contestar as mensaxes". O vídeo non tardou en ser multitudinariamente reproducido e, ademais, en ter comentarios tamén de parte doutros creadores de contido galegos como Totateki, Champi Muros ou Rebeca Stones, dándolle a Lucas a razón. "Ao final o vídeo chegou a 300.000 visitas, algo que non é nada doado tendo en conta que é contido en galego, e moitas marcas vírono, así que ao final mandáronme varios lotes de produtos á casa, como as galletas mariñeiras que demandara", conta. A popularidade de Lucas acadou tal punto que "agora, pola Costa da Morte, ata me piden fotos pola rúa", chancea.

"EU SON DE CORME, DA COSTA DA MORTE, E O 75 % DA XENTE FALA GALEGO, CON GHEADA E SESEO; O ÚNICO GALEGO QUE SE FALA MAL É O QUE NON SE FALA"

Entre todos os comentarios positivos que recibe Lucas, tamén se coan algúns que son semellantes aos de moitos outros creadores de contido en galego, do tipo 'por que fas contido en galego?' ou 'por que non falas en castelán para chegar a máis xente?'. "Eu son consciente de que, ata certo punto, teñen razón cando din que en castelán podo chegar a máis xente e, se queres medrar en apoios e marcas, ao final chega un punto no que te tes que abrir, pero o meu idioma nativo é o galego e gústame crear na miña lingua", reivindica. Agora ben, tamén confesa que "ás veces fago entrevistas no que chamamos 'castrapo', falando en castelán e metendo galego polo medio, ou ao revés". Ademais, Lucas amósase consciente de que "a polémica viraliza e é do que se vive no mundo das redes sociais", así que non lle importan os comentarios negativos nin recibir críticas, porque estas últimas, se son dende o respecto, sempre serán aceptadas. "Eu son de Corme, unha vila da Costa da Morte, na comarca de Bergatiños, e aquí o 75 % da poboación fala en galego, polo que os rapaces criámonos falando galego, con gheada e seseo", defende, apuntando que "tamén teño vídeos que reivindican estas variantes dialectais, porque eu sempre digo que o único galego que se fala mal é o que non se fala".

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)