Sanidade di que o xinecólogo de Verín é inocente "salvo que o expediente se resolva en sentido contrario"

O conselleiro de Sanidade, Julio García Comesaña, afirmou que o profesional que participou hai un ano na mobilización contra o peche do paritorio de Verín é inocente "salvo que o expediente se resolva en sentido contrario".

"Imos ser respectuosos co xinecólogo, coa pediatra e co inspector médico", subliñou o conselleiro no pleno do Parlamento, a preguntas da deputada do BNG Noa Presas, quen acusou aos populares de estar "borrachos de maioría absoluta".

Ante "feitos graves" que "merecen unha explicación", a nacionalista advertiu de que o ocorrido con este profesional "parece unha cazaría política" e por iso esixiu "unha explicación, a que non foi capaz de dar esta mañá o presidente da Xunta".

Pola súa banda, o titular de Sanidade reiterou que "en ningún momento" este asunto "pasou pola mesa da dirección sanitaria, nin pola do conselleiro, nin pola do presidente da Xunta", e asegurou que "a única participación" da xerencia de Ourense foi a referida a "evitar interferir nel".

Así as cousas, expuxo que foi a inspección sanitaria a que fixo "unha información reservada" que agora pasou "a fase de instrución". Respecto diso, apelou á posibilidade que terá o profesional para alegar en varios momentos e destacou que se trata dun proceso "absolutamente garantista".

"Non me escoitará dicir nin unha soa palabra sobre este profesional", afirmou García Comesaña, antes de argumentar que "presión política sería pronunciarse", algo que si achacou aos grupos da oposición.

VIOLENCIA DE XÉNERO

Por outra banda, a sociedade galega está "particularmente concienciada" fronte á violencia de xénero, segundo a última macroencuesta neste ámbito realizada pola Xunta.

Así o destacou a conselleira de Emprego e Igualdade, María Jesús Lorenzana, a unha pregunta da deputada do PP Paula Prado no pleno do Parlamento.

A conselleira lembrou as cifras desta macroenquisa, cuxos resultados presentou recentemente en rolda de prensa. Pola súa banda, Prado avogou por "eliminar o tic machistas e micromachismos".