O centro Aspanaes do Monte do Gozo será unha aposta da Xunta "polo turismo inclusivo"
O Executivo autonómico subscribiu o ano pasado un acordo con esta asociación para a cesión do edificio do cámping do Monte do Gozo, que estaba en desuso, por un período de 33 anos.
Por E.P. | SANTIAGO DE COMPOSTELA | 12/12/2020 | Actualizada ás 16:47
O Goberno galego destacou as actuacións de rehabilitación e adaptación para impulsar o novo centro asistencial e turístico da Asociación de Pais de Persoas con Trastorno do Espectro Autista (Aspanaes), situado no Monte do Gozo, e que a Xunta enmarcou no seu obxectivo de fomentar e potenciar a "inclusión" en materia turística.
Así o trasladaron este sábado o vicepresidente primeiro da Xunta, Alfonso Rueda, e a conselleira de Política Social, Fabiola García, durante unha visita ás obras que se están realizando nestas instalacións.
Precisamente, o Executivo autonómico subscribiu o ano pasado un acordo con esta asociación para a cesión do edificio do cámping do Monte do Gozo, que estaba en desuso, por un período de 33 anos.
As actuacións de reforma contan cun investimento de máis de 764.800 euros e permitirán contar cun centro de día con servizos terapéuticos para persoas con Trastorno do Espectro Autista e recursos de prevención de situacións de dependencia, promoción da autonomía persoal e fomento do turismo inclusivo.
Rueda destacou a importancia desta aposta ás portas do Xacobeo 2021, para contar cun Camiño de Santiago "máis accesible" e integrador. Así, lembrou as actuacións previstas nesta materia nos traballos de acondicionamento destas rutas e traballos previstos no Plan de Albergues 2019-2021.
No caso do centro de Aspanaes, as obras enmárcanse no Plan de Revitalización do Monte do Gozo, dotado con 7,4 millóns de euros co fin de convertelo nun símbolo do Xacobeo 21 e en punto de encontro entre os peregrinos e a cidadanía compostelá.
MELLORAR A CALIDADE DE VIDA
Pola súa banda, a titular de Política Social puxo en valor os 40 anos de traxectoria de Aspanaes, nos que a asociación a traballado a diario para mellorar a calidade de vida e a autonomía das persoas con TEA, ademais de con as súas familias.
Neste sentido lembrou que os orzamentos do Goberno galego para o próximo ano prevén un incremento do apoio ás entidades atención á discapacidade que ascende nun 10 por cento, ata chegar aos 126 millóns de euros.
