Piden incluír a policías e xuíces nas listaxes de vacinación preferente

O Colexio de Avogados da Coruña solicitou á Xunta de Galicia a inclusión do persoal da Administración de Xustiza (xuíces, fiscais, funcionarios,...), xunto a Corpos e Forzas de Seguridade, na vacinación preferente, "unha vez vacinados os grupos prioritarios, cumprindo co protocolo establecido".

O Colexio de Avogados da Coruña argumenta esta solicitude en que, mediante esta vacinación preferente aos axentes activos da Xustiza, "garantiríase o acceso a este servizo e a cidadanía manterá intacto un dos seus dereitos fundamentais". Xunto a eles, cre que deberían estar incluídos as avogadas e avogados adscritos ao servizo público de asistencia ao detido preso ou investigado que prestan, todos eles, os seus servizos nos xulgados de garda e centros de detención.

"O seu traballo en diferentes actuacións fai que o seu grao de exposición á enfermidade sexa moi elevado, polo que consideramos que a vacinación preferente é primordial para garantir a saúde destes profesionais e a da cidadanía á que prestan servizo", recalca. Ao fío diso, indica que a avogacía da quenda de oficio presta "un servizo esencial e é fundamental que poidan ofrecer o seu servizo á cidadanía xa que garante a tutela xudicial efectiva e o dereito de defensa", sinala a Xunta de Goberno do Colexio de Avogados da Coruña.

Axente da Guardia Civil | Fonte: Arquivo Europa Press