Periga a campaña marisqueira da ría de Muros e Noia polo tren de temporais
Mar avaliará os bancos marisqueiros afectados.
Por Europa Press / Redacción | SANTIAGO DE COMPOSTELA | 08/02/2021 | Actualizada ás 17:05
A conselleira do Mar, Rosa Quintana, reuniuse este luns con representantes das confrarías de Portosín e Porto do Son para coñecer a situación do sector tras os temporais da pasada semana que afectaron a bancos marisqueiros. Unha situación que ameaza a campaña marisqueira desta ría xa moi tocada pola covid tal e como relatou Galicia Confidencial hai unhas semanas.
Así, trasladou o seu apoio ao sector, aínda que chama a esperar pola avaliación completa dos bancos marisqueiros antes de adoptar medidas. Técnicos da Consellería do Mar traballan no seguimento das zonas nas que se rexistrou unha baixa salinidade nas augas e desprazamento do marisco cara ás praias como consecuencia do mal tempo, o que pon en risco a supervivencia das distintas especies de bivalvo.
Ademais, Rosa Quintana resaltou que nos últimos días publicouse no Diario Oficial de Galicia (DOG) a convocatoria para 2021 de axudas a proxectos colectivos de conservación e restauración da biodiversidade e ecosistemas mariños.
Estas axudas, financiadas polo Fondo Europeo Marítimo e de Pesca (FEMP), contan cun orzamento dun millón de euros, mentres poden ser empregadas para paliar os danos como os producidos en bancos marisqueiros de Rianxo.
