Pino (Cs): "Non hai escusa para que os gardas civís en Galicia sexan os únicos de España sen vacinar"

"Non hai escusa para que os gardas civís en Galicia sexan os únicos de España sen vacinar a día de hoxe". Así o trasladou este xoves a coordinadora de Cs en Galicia, Beatriz Pino, quen se fixo eco das queixas de Unión de Gardas Civís en Galicia que xa denunciaron esta situación, ademais da "falta de información" por parte do Ministerio do Interior.

Cs puxo en valor o traballo que realizan en Galicia preto de 5.000 axentes da Garda Civil, e por iso pediu á Xunta de Galicia que explique por que razón os membros deste corpo son "os únicos de toda España que non foron vacinados a día de hoxe".

Tamén este xoves, Cs defendeu que, se non se ten en conta a emenda presentada pola formación laranxa, a Lei de Cambio Climático que se tramita no ámbito estatal "porá en risco a unha gran parte da industria galega".

A coordinadora de Cs Galicia alertou da "preocupante situación" , xa que "están en xogo case 40.000 postos de traballo e 10.000 millóns de euros".