Preocupación entre os traballadores de R polas súas condicións laborais trala OPA de MásMóvil
O comité de Euskatel, ao que pertence a galega R, pide á compañía que aclare as intencións do seu proxecto. MásMóvil anuncia que garantirá o mantemento dos postos de traballo durante, polo menos, cinco anos.
Por E.P. | Santiago de Compostela | 29/03/2021 | Actualizada ás 16:44
O comité de empresa de Euskaltel espera que MásMóvil aclare as intencións coa súa OPA sobre o 100% de Euskaltel e se realmente pretende afianzar "un proxecto a longo prazo" ou a súa operación é un "mero investimento de especulación".
Segundo apuntou o presidente do comité de Euskaltel (CC.OO.), Javier del Branco, a empresa confirmoulles que existe un acordo con ese tres principais accionistas que apoian a operación e que hai unha garantía de cinco anos para manter o emprego, as marcas e a sede social. O presidente do comité de empresa indicou que lles gustaría dispor dunha información "máis ampla e con maior detalle", xa que, por agora, non hai contacto con MásMóvil.
O presidente do comité explicou que, no momento de saída a Bolsa de Euskaltel, xa trasladaron que era "unha perda de identidade e de capacidade", e supuña un "erro", como outros que, ao seu xuízo, foran cometidos anteriormente pola dirección. O presidente do comité afirmou que por iso existe "preocupación e prudencia" ante esta operación e esperan que lles faciliten información que lles permita ter "visibilidade" respecto dos plans de MásMóvil.
RESPOSTA DE MÁSMÓVIL
Pola súa banda, o CEO de MásMóvil, Meinrad Spenger, afirmou que a OPA a Euskaltel é un "proxecto de crecemento" entre dúas empresas "complementarias" e asegurou que non quere cambiar "nin a entidade, nin a marca, nin a sede da compañía, nin, por suposto, a proximidade e o arraigamento" a Euskadi. Así mesmo, destacou que hai un "compromiso a medio e longo prazo" co emprego, que se garante, polo menos, durante cinco anos.
En declaracións a Radio Euskadi, recollida por Europa Press, Spenger referiuse, desta maneira, á OPA a Euskaltel que anunciou a súa compañía, e que foi aceptada xa por algúns dos principais accionistas do operador vasco. Spenger valorou o acordo existente para esta operación e mostrou o seu agradecemento aos accionistas de Euskaltel porque pecharon "un acordo de colaboración forte e de forma rápida".
