Os traballadores da planta de Nostián levarán as súas protestas a María Pita
Denuncian a "falta de persoal" e a "sobrecarga de traballo" das instalacións de tratamento de residuos na cidade.
Por E.P. | SANTIAGO DE COMPOSTELA | 29/03/2021 | Actualizada ás 17:14
Os traballadores de Albada concentraranse os próximos días 31 de marzo e 8 de abril na praza de María Pita para denunciar a "falta de persoal" e a "sobrecarga de traballo". Ademais, piden unha mesa de diálogo ao Concello.
Así o avanzou o comité nunha prensa celebrada este luns na sede de UGT na Coruña. "Reclamámoslle ao Concello que licite a obra que prometeu no seu momento", asegurou o presidente do comité de empresa, Julio Martínez, quen lembrou que, segundo a promesa do PSOE, os pregos do proceso "estarían a finais de 2020". Ante a falta de noticias, o presidente do comité pide ao Consistorio unha mesa de diálogo para "que informe sobre a licitación da planta" aos traballadores.
PROBLEMAS NA PLANTA
Pola súa banda, o representante da CIG Adrián Canosa denunciou a falta de persoal e a "sobrecarga de traballo". "Hai un só traballador por cinta e escápase o plástico e o cartón, que acaban nun vertedoiro", afirmou Canosa. Tamén cualificou de "lamentable" a situación nas instalacións e asegurou que "chove dentro das naves sobre os cadros eléctricos" e que "caeu un falso teito que estivo a piques de alcanzar a un traballador".
Pola súa banda, o membro do comité Ernesto Veciño subliñou que "toda a materia orgánica vai a un vertedoiro, aínda que a xente sepáreo nas súas casas". Segundo afirmou Veciño, esta situación prodúcese desde a apertura da planta e en todo este tempo "non se vendeu nin un gramo de compost".
