Ábalos e Feijóo apelan á "cooperación leal" entre Goberno central e Xunta

O ministro de Transportes, Mobilidade e Axenda Urbana, José Luís Ábalos, e o presidente da Xunta, Alberto Núñez Feijóo, apelaron á "cooperación leal" entre administracións, especialmente no actual contexto de pandemia, coincidindo coa visita que o primeiro fixo a Galicia.

Ambos os dous coincidiron en subliñar a importancia da "lealdade institucional" no acto de toma de posesión do novo delegado do Goberno en Galicia, José Miñones.

Nel, o ministro de Transportes reivindicou o labor do Goberno en Galicia. "Xamais se estivo ausente", dixo defendendo a repercusión nesta autonomía de medidas vinculadas á política social ou o reto demográfico, ademais de investimentos en infraestruturas.

Tamén agradeceu ao presidente da Xunta o seu "trato", mentres que Feijóo aproveitou a súa intervención para subliñar a "utilidade e vixencia" do autogoberno, pero apostando pola "cooperación leal".

"Máis que a bandeira de Galicia, destaca en tempos difíciles a estabilidade", apuntou o titular do Executivo galego quen, de cara á reunión que manterá este venres en Santiago con Ábalos, avanzou que o obxectivo será facer un "repaso" de distintas actuacións. "E seguir abordando as infraestruturas co mesmo ton de cordialidade e lealdade".