O goberno de Santiago pide á Xunta que "deixe de enredar" coas VUT e elimine as que carecen de título habilitante

A concelleira de Turismo e portavoz do Goberno local de Santiago, Míriam Louzao, reclamou este luns á Xunta de Galicia que exclúa do Rexistro de Empresas e Actividades Turísticas (REAT) as Vivendas de Uso Turístico (VUT) que non conten cun título habilitante municipal, requisito establecido pola propia normativa autonómica. "Non pedimos nada que non estea no seu decreto", afirmou Louzao, que instou á administración galega a tomar medidas sobre a situación destas vivendas en Santiago. A edil acusou á Xunta de "enredar" con este asunto, xa que considera que non se está aplicando a normativa vixente de maneira efectiva.

Segundo explicou, o Concello si remite individualmente as solicitudes á Xunta, aínda que indicou que non é unha obriga municipal, xa que o rexistro pertence á administración autonómica e debe ser esta a que controle o cumprimento dos requisitos. "Pola mañá pídennos que deamos seguridade xurídica a estas vivendas e pola tarde recoñecen que o REAT non serve para nada", sinalou Louzao. A concelleira reiterou que o propio decreto autonómico establece que para inscribir unha vivenda no rexistro debe contar con autorización municipal, polo que a Xunta, segundo indicou, debería retirar as que non cumpren esta condición.

CHAMA Á ACCIÓN Á XUNTA DE GALICIA

Desde o Concello compostelán insisten en que a presenza de vivendas turísticas sen título municipal no REAT non debería producirse, xa que a normativa autonómica esixe esta autorización previa. "Non ter título habilitante municipal xa non permíteche estar nesa listaxe, así que deben tomar as medidas que consideren adecuadas", apuntou Louzao. A concelleira de Turismo subliñou a importancia do cumprimento da normativa para garantir a seguridade xurídica no sector turístico e advertiu que este problema afecta de forma directa á regulación do mercado de vivenda en Santiago de Compostela. Con esta petición, o Goberno municipal busca que a Xunta axilice a depuración do rexistro e evite a permanencia de vivendas que non cumpren os requisitos esixidos, nun contexto no que a proliferación de VUT en Santiago xerou debate sobre a súa regulación e impacto na cidade.

RESPOSTA DE RUEDA

Pola súa banda, o presidente da Xunta, criticou duramente ao Concello de Santiago tras esta nova polémica. "Como non queren falar da súa taxa turística e como non saben que facer, pois falan disto", dixo Rueda, ao ser preguntado ao respecto. "Eles saben que hai unha mecánica establecida para que a Xunta dea de baixa esas vivendas e, polo tanto, só teñen que seguir as normas establecidas", engadiu, ao tempo que criticou que o Goberno local actúa en función de "proclamas" políticas.