Galicia inicia a semana con repunta nos hospitais e nos casos activos
Os novos contaxios descenden a 126 e a taxa de positividade cae por baixo do 2%.
Por Europa Press / Redacción | SANTIAGO DE COMPOSTELA | 12/04/2021 | Actualizada ás 10:59
Galicia inicia esta semana cunha repunta da presión hospitalaria, ao aumentar a 185 os pacientes Covid ingresados, o que supón 13 máis que a xornada anterior, e os casos activos seguen en aumento e sitúanse en 2.316, mentres que os novos contaxios descenden a 126.
Segundo os datos actualizados na mañá deste luns pola Consellería de Sanidade con rexistros ata as 18,00 horas deste domingo, soben a 30 os pacientes Covid na UCI de Galicia, tres máis, e ascenden a 155 os que permanecen noutras unidades, dez máis.
En concreto, os pacientes con coronavirus hospitalizados aumentan en seis das sete áreas sanitarias galegas, mentres que na de Ferrol seguen sen cambios, con ningún en UCI e cinco noutras unidades.
Pola súa banda, o maior aumento corresponde ás áreas da Coruña e Cee, con 10 en UCI --un máis-- e 58 noutras unidades --tres máis--; e á de Santiago e Barbanza, que conta con cinco pacientes Covid en críticos --un máis-- e 22 noutras unidades --tres máis--.
Mentres, na de Vigo mantéñense seis en UCI e soben a 29 os doutras unidades --dúas máis--; e na de Ourense continúan dúas en críticos e aumentan a 19 os doutras unidades --un máis--. Na de Pontevedra seguen tres en UCI e increméntanse a 18 os doutras unidades --uno máis--; e na de Lugo aumentan a catro o críticos --un máis-- e proseguen catro noutras unidades.
MÁIS CASOS ACTIVOS
Por cuarta xornada consecutiva os casos activos de Covid-19 aumentan en Galicia, aínda que esta vez lixeiramente, ata os 2.316, o que supón 11 máis, ao haber máis contaxios (126) que altas (115). Por áreas sanitarias, os casos activos soben nas de Pontevedra e O Salnés (+12), Ourense (+10) e na de Ferrol (+7), mentres que se manteñen sen cambios na da Coruña e Cee; e baixan nas de Vigo (-15); Santiago e Barbanza (-2) e Lugo (-1).
Deste xeito, á cabeza mantense a da Coruña e Cee, con 616 casos activos; seguida da de Vigo, con 599; Santiago e Barbanza, 355; Pontevedra e O Salnés, 327; Ourense, 186; Lugo, 157; e Ferrol segue á cola, con 76.
MENOS CONTAXIOS
Tras superar a barreira dos 200 novos contaxios este pasado sábado e descender a 174 este domingo, Galicia arrinca esta semana con 126 detectados por calquera tipo de proba. Deses, 113 son positivos confirmados por PCR nas últimas 24 horas --fronte aos 157 da xornada anterior--, dos que 32 corresponden á área da Coruña e Cee; 22, á de Pontevedra e O Salnés; 18, á de Santiago e Barbanza; 12, á de Vigo; 12, á de Ourense; 11, á de Ferrol; e seis, á de Lugo.
En canto á taxa de positividade, descendeu a un 1,8 por cento en Galicia, tras ascender ao 3% a xornada anterior, polo que se por baixo do 5% que a Organización Mundial da Saúde (OMS) fixa para dar por controlada a pandemia.
