Feijóo sae en defensa do partido ultradereitista Vox

O presidente da Xunta e líder do PP galego, Alberto Núñez Feijóo, mostrou o seu rexeitamento aos incidentes rexistrados durante a precampaña das eleccións madrileñas en actos de Vox e mostrou o seu apoio á organización de Santiago Abascal. "Os fascistas son os que tiran perdas, non os que dan mitins solicitando un voto democrático; é xusto ao revés", sinalou.

O titular do Goberno galego, Alberto Núñez Feijóo, no Consello da Xunta | Fonte: David Cabezón - Xunta de Galicia.

O mandatario galego cualificou de "fascistas" as persoas "que interrompen un acto político e mesmo tentan agredir tirando pedras", en referencia aos incidentes rexistrados a pasada semana nun acto organizado por Vox no madrileño barrio de Vallecas.

"Iso é o que se parece máis ao fascismo", engadiu Feijóo, que di estar soprendido por que estas persoas "non se dan conta de que os fascistas son eles", á vez que tachou de "decepcionante" que "40 anos despois" da transición desde a ditadura de Francisco Franco continúe este debate aberto.

"Isto non lle ocorre á maioría dos países", continuou o presidente do PP galego, que, a continuación, acusou de non ter "nin idea do que están a falar" ás persoas que se sitúan deste xeito, posto que "non naceran" ou "non tiñan uso de razón" durante os anos de ditadura como "a maioría dos políticos" na actualidade.

"Un pouco de respecto pola historia e pola verdade. Con independencia de que cada un interprete a historia e teña a súa propia verdade", resolveu Feijóo.

GRANDE MARLASKA

Cuestionado sobre a polémica en torno ao ministro do Interior, Fernando Grande-Marlaska, e o cesamento, posteriormente anulado pola Audiencia Nacional, do coronel Diego Pérez de los Cobos, Núñez Feijóo sinalou que "se o ministro fose do PP, o PSOE estaría a pedir todos os días a súa dimisión".

Neste sentido, tras incidir en que o cesamento de Pérez dos Cobos foi "moi sorprendente", o presidente galego enxalzou a traxectoria do coronel dentro da Garda Civil.