O Sergas pide axuda aos sindicatos para promover a vacinación dos menores de 60 anos con primeira dose

A directora xeral de Recursos Humanos do Sergas, Ana Comesaña, mantivo este venres un encontro cos representantes sindicais que están na mesa sectorial para pedirlles a súa colaboración na promoción da vacinación entre os menores de 60 anos que recibiron a primeira dose de Astrazeneca, fundamentalmente os ao redor de 60.000 galegos que pertencen a colectivos esenciais.

Tamén estivo presente o xerente do Sergas, José Flores, ao final do encontro, que serviu para obter o compromiso das centrais sindicais de seguir impulsando a vacinación entre este colectivo, que ten que asinar un consentimento informado no caso de que se rexeite a opción de Pfizer como segunda dose para completar a pauta, a aprobada pola comisión de vacinas estatal.

Ademais, no caso galego, os cidadáns tamén teñen que asinar un consentimento informado se optan por vacinarse coa vacina de ARNm. É dicir, tanto elixan a opción que aprobou a comisión de vacinas, como opten por Astrazeneca --a que recomenda o propio Sergas--, teñen que dar o seu consentimento informado.

Precisamente, o sindicato CIG manifestouse na reunión en contra desta opción, posto que considera que "non se pode someter a esta presión" á cidadanía. É dicir, consideran que debería dicirse verbalmente por cal vacina se opta, pero non ter que asinar un documento sen que, en realidade, haxa o tempo efectivo para recibir a información das vantaxes e inconvenientes de cada unha das vacinas por parte da enfermeira que lles atende.

En todo caso, todos os sindicatos mostraron a súa vontade de seguir apoiando a vacinación. Concretamente, o encontro tivo lugar con CIG, CCOO, CSIF, SATSE e UGT.

PROTOCOLOS PARA DETERMINADOS COLECTIVOS

Na reunión, tamén se informou de que a próxima semana o Sergas emitirá instrucións específicas e información sobre as pautas de vacinación de determinados colectivos, como embarazadas e lactantes ou grupos de risco como pacientes con fibroses císticas.

Doutra banda, segundo informou o SUP, que se reuniu con responsables da Policía Nacional, os integrantes deste corpo de seguridade están vacinados nun 99,9 por cento entre o persoal que aceptou recibir a inmunización. Ademais, algo menos do 5 por cento expresou o seu desexo de non recibir ningunha inxección.

Aínda hai casos puntuais de falta de vacinación por situacións persoais concretas, os cales serán 'repescados'. Ademais, informóuselles na reunión de que en total hai catro casos de infectados e outro catro illados.