Publicada a licitación para seleccionar entre catro e oito socios para o Polo Aeroespacial de Galicia

O Diario Oficial de Galicia publica a licitación pública para seleccionar entre catro e oito socios estratéxicos e tecnolóxicos para o Polo Aeroespacial de Galicia. Cun orzamento de 40 millóns de euros, o prazo de recepción de solicitudes para participar na fase previa estará aberto ata o 10 de setembro.

As empresas que desexen participar no proceso deben cumprir varios requisitos e presentar ata un máximo de vinte servizos ou proxectos de I+D+i realizados nos últimos cinco anos. Esta licitación ten por obxectivo xerar resultados como a firma de acordos de asociación con entre 4 e 8 empresas, desenvolver 80 proxectos de I+D, construír novos hangares no Parque Tecnolóxico e Industrial de Rozas e conseguir un efecto tractor sobre 80 pemes galegas, multiplicando así a capacidade tecnolóxica do territorio.

"Esta licitación abre grandes oportunidades para as empresas e centros de coñecemento galegos que xa participaron en proxectos do Polo Aeroespacial de Galicia", destaca a Xunta. A selección de socios para o próximos cinco anos realizarase mediante un proceso de diálogo competitivo. Finalizada esta fase previa de solicitudes de participación e documentación, iniciarase un período de diálogo no que as empresas convidadas a participar -un mínimo de 2 e un máximo de 10- deberán presentar as súas propostas.

Posteriormente, celebrarase a fase de peche e selección de programas conxuntos de interese preferente, na que as empresas deberán presentar as propostas de solución final; e a fase de peche financeiro, na que deberán presentar a documentación acreditativa da dispoñibilidade e acceso a fontes de financiamento complementarias propostas.

Arquivo - Drone. XUNTA - Arquivo | Fonte: Europa Press