A Xunta pechará os grandes centros de vacinación este mes
Sanidade seguirá vacinando en hospitais a partir de outubro e valorará a inoculación en centros de saúde. Poderá abrir a Cidade da Cultura ou os recintos feirais das cidades en caso de vacinacións masivas de menores de 12 anos.
Por Europa Press / Redacción | SANTIAGO DE COMPOSTELA | 27/09/2021 | Actualizada ás 13:07
A Consellería de Sanidade manterá "probablemente" a actividade de vacinación nos hospitais a partir de outubro, dado que a previsión é que o 30 de setembro sexa o último día en que haberá centros de vacinación 'masiva' e que, para entón, a inmensa maioría da poboación galega (maior de 12 anos) estea xa vacinada.
Así o explicou o conselleiro Julio García Comesaña, durante a súa intervención nun acto de vacinación de deportistas no Hospital Álvaro Cunqueiro de Vigo. Segundo lembrou, o 30 de setembro deixarán de estar operativos os puntos de vacinación masivos que, en todo caso, poderanse reactivar cando se autorice a inoculación aos nenos menores de 12 anos.
Precisamente por iso, o titular de Sanidade animou á xente que aínda teña pendente a súa vacina a que se achegue a algún dos 15 puntos de vacinación habilitados ata finais de setembro, nos que poderá recibir a súa dose sen necesidade de cita previa, ou ben pedíndoa por internet ou WhatsApp. Respecto diso, lembrou que este fin de semana máis de 6.000 persoas foron vacinadas e que o sistema de cita previa por WhatsApp foi utilizado por uns 600 galegos.
García Comesaña afirmou que, a partir do 30 de setembro non haberá vacinación en recintos feirais, aínda que pode quedar algún aberto de forma puntual o primeiro fin de semana de outubro se hai "segundas doses previstas".
HOSPITAIS E CENTROS DE SAÚDE
"Probablemente sigamos con hospitais para segundas doses e para casos puntuais ou persoas que localicemos", sinalou e, a preguntas dos medios sobre a posibilidade de vacinar en centros de saúde, sinalou que "non está pechado" pero "non se descarta".
Respecto diso, precisou que Sanidade ten "varias frontes abertas respecto doutros colectivos", para os que os centros de saúde poderían "funcionar", ou para outros casos, por exemplo, se se inocula outra dose a todos os maiores de 80 anos. "Pero irémolo vendo segundo evolucionen as conclusións da Comisión de Saúde Pública e do Consello Interterritorial", explicou.
VACINACIÓN DE DEPORTISTAS
Julio García Comesaña fixo estas declaracións tras un acto de vacinación no Hospital Álvaro Cunqueiro, no que se deron cita deportistas e responsables de clubs, e no que tamén participaron o secretario xeral para o Deporte, José Ramón Lete; a delegada da Xunta en Vigo, Marta Fernández-Tapias; e o xerente do Chuvi, Javier Ponte.
EVOLUCIÓN DA VACINACIÓN
En canto aos datos actualizados na mañá deste luns no 'Cronómetro de vacinación', Galicia conta con 2.254.070 persoas con pauta completa, tras finalizar o proceso outras 183, o que supón que o 91,83 por cento da poboación diana -maiores de 12 anos-- está inmunizada e un 83,4% dos cidadáns residentes en Galicia.
