Mª Jesús Lorenzana percorre unha etapa do Camiño Francés en apoio ao emprendemento na economía social
"O Camiño Emprendedor" é un programa de mentoring promovido pola Xunta.
Por E.P. | SANTIAGO DE COMPOSTELA | 03/10/2021 | Actualizada ás 12:28
A conselleira de Emprego e Igualdade, María Jesús Lorenzana, percorreu unha parte do Camiño Francés --entre O Pino e Santiago de Compostela--, organizado no marco do programa de mentoring 'O Camiño Emprendedor' promovido pola Xunta.
A iniciativa, segundo indicou a Consellería nun comunicado, está promovida a través da Rede Eusumo de impulso á economía social, e a Fundación Ronsel, "no que se forma en competencias a 60 emprendedores sociais e a outras 60 persoas como mentoras".
Así, ao longo de catro etapas --dúas do Camiño de Inverno, unha do Portugués e unha do Francés-- que finalizan este domingo na Praza do Obradoiro, os participantes realizaron dinámicas de mentoring personalizadas co fin de "adaptar os ensinos froito da experiencia do mentor ou mentora á realidade de cada participante".
Os participantes son emprendedores cun novo proxecto empresarial en marcha ou unha idea de negocio avanzada, vinculada ao sector da economía social. Coa iniciativa, indican, o que se pretende é "crear unha contorna de aprendizaxe que permita impulsar o desenvolvemento de novas capacidades emprendedoras e optimizar as xa existentes".
A actividade busca ofrecer apoios e axudar a persoas, empresas e entidades participantes da economía social, "concienciándoas da importancia da formación continua ao longo de toda a vida, como fórmula eficaz para consolidar negocios, gañar en produtividade e facelos crecer".
O programa une a experiencia da peregrinación co potencial emprendedor dos galegos na economía social, "a través de dez competencias crave para a iniciativa empresarial": a procura de oportunidades, a persistencia, o cumprimento dos compromisos, a eficiencia e a calidade, asumir riscos calculados, a fixación de obxectivos, a procura de información, a planificación e o seguimento, a persuasión e contactos, e autoconfianza e independencia.
