Santiago, elexida para acoller unha reunión do Comité Europeo das Rexións durante o Ano Santo 2022

Santiago de Compostela acollerá unha reunión do Comité Europeo das Rexións (CdR) no ano 2022, coincidindo coa celebración do Xacobeo. A capital galega foi seleccionada para acoller a cita na reunión da comisión de Recursos Naturais (NAT) do Comité celebrada esta semana, na que participou o director xeral de Relacións Exteriores e coa UE, Jesús Gamallo.

Tras o encontro, o director xeral mostraba a súa satisfacción polo resultado favorable á proposta galega, que competía con outras dúas localizacións, unha na República Checa e outra en Lituania.

Ademais, destacou, a "idoneidade" da candidatura "ao promover, por unha banda, o modelo de turismo sustentable que exemplifica o Camiño de Santiago", en liña coas prioridades da Comisión Europea e coa definición de turismo sustentable achegada pola Organización Mundial de Turismo; e, por outra, "a cohesión social e xeográfica europea con percorridos que atravesan ata 28 países do continente".

Segundo informou a Vicepresidencia Primeira e Consellería de Presidencia, Xustiza e Turismo, outros asuntos abordados na sesión foron o documento de traballo 'Visión a longo prazo para as zonas rurais' e os ditames 'Plan de acción para a agricultura ecolóxica', 'Plan Europeo de loita contra o cancro' e 'Economía azul sustentable e acuicultura'.

Sobre este último punto, Galicia presentou unha emenda para favorecer "unha diversificación económica e laboral que parta da compatibilidade da pesca tradicional coa acuicultura", de forma que se aproveiten as sinerxías comerciais e produtivas entre ambas.

Coa aprobación do ditame, Galicia "avala" o recoñecemento da acuicultura como un ámbito político para o que se debe prever un finaciamiento específico e apoia, ademais, a toma de medidas respecto das importacións máis baratas procedentes de fóra da Unión Europea.

Varios peregrinos camiñan coa súa bicicleta pola Rua do Franco de Santiago. César Arxina - Europa Press