A Xunta confirma un aumento de casos na Coruña e Ourense tras viaxes á costa mediterránea

As autoridades sanitarias teñen confirmadas persoas contaxiadas por Covid tras viaxes á costa mediterránea, "tanto persoas que viven en Ourense e zonas perimetrais como persoas que viven na cidade da Coruña", segundo expuxo o presidente da Xunta, Alberto Núñez Feijóo, na rolda de prensa posterior ao Consello da Xunta.

Preguntado polas excursións a Benidorm detrás da repunta de casos que rexistra a área sanitaria de Ourense nos últimos días, sumou tamén un incremento de casos na Coruña, "vinculados con viaxes á costa mediterránea".

"Seguiremos facendo estudo caso por caso para coñecer se hai unha relación máis grande ou son casos illados de viaxes que se produciron de forma individual", expuxo Feijóo, quen precisou que, do sistema de rastrexo, non teñen confirmación "se o maior número de casos proceden de viaxes ou outras cuestións".

No entanto, manifestou que si está confirmado que do número de persoas contaxiadas que detectaron este mércores "si que hai viaxes á costa mediterránea". "Tanto de persoas que viven en Ourense e zonas perimetrais como persoas que viven na cidade da Coruña". "Veremos se é un gromo único ou se forma parte do conxunto de gromos", apuntou Feijóo, quen admitiu que lles gustaría que fose "único" para facilitar o seguimento. "Pero ás veces son gromos dispersos e non é tan sinxelo", recoñeceu.

PERMANECER "VIXIANTES"

O presidente da Xunta advertiu que a pandemia "non terminou" e instou a permanecer "vixiantes" tras os gromos e empeoramento da situación epidemiolóxica que se constatou nos últimos días en Galicia. Aínda que Galicia, destacou, preserva os "mellores" datos de España en todos os parámetros (incidencia a 7 e a 14 días, vacinación e hospitalización), Feijóo insistiu en que é preciso manter as precaucións e mesmo extremar o uso das máscaras e dos medidores de CO2 nos locais.

Non en balde, subliñou que o tempo empeorou, polo que se incrementan as reunións sociais en interiores de locais e vivendas, o que pode favorecer os contaxios da covid-19.

MATERIAL FRONTE Á COVID

Feijóo tamén trasladou que, desde abril de 2020, se repartiron máis de 42,2 millóns de unidades de material de protección e de detección da covid-19 aos centros de servizos sociais galegos, cun valor de 10,7 millóns de euros. Máis da metade do total destinouse ás residencias de maiores, os centros que máis sufriron o impacto do coronavirus. Entre o material distribuído están 350.000 test de antíxenos, 21 millóns de máscaras cirúrxicas e 18 millóns de luvas.

Por outra banda, o Consello autorizou a tramitación de emerxencia de tres expedientes cun orzamento que supera os 1,6 millóns de euros, destinados á adquisición de material fronte á covid-19 nas áreas sanitarias de Santiago e O Barbanza, Ferrol e Vigo.