Caballero busca un compromiso do PPdeG e da nova dirección do PSdeG para "actualizar" o Estatuto de autonomía

O portavoz do Grupo Parlamentario Socialista e secretario xeral saínte do PSdeG, Gonzalo Caballero, preguntará ao presidente da Xunta, Alberto Núñez Feijóo, sobre a súa disposición a "actualizar" o Estatuto de Autonomía, "unha vez superada a pandemia, para melloralo e incorporar un decálogo de dereitos que deberían ser blindados e garantidos á cidadanía de Galicia".

En palabras do viceportavoz do Grupo Socialista, Pablo Arangüena, esta iniciativa parte dos "compromisos programáticos" cos que o PSdeG se presentou ás eleccións galegas, polo que considera que entran tamén dentro da estratexia da futura nova dirección socialista. De "querer cambiar a liña e esa tradición" do PSdeG", engadiu, "terán que manifestalo expresamente".

Esta iniciativa "toma como base" as "singularidades" porque, "como dicían 'Os Resentidos', Galicia si é distinta". Por iso, Arangüena remarcou que a Xunta "pode e debería adquirir un compromiso en relación á reforma dle Estatuto", xa que desde que chegou Feijóo á Xunta "non asumiu nin unha soa competencia". "O Estatuto leva 40 anos sen cambiar unha coma, unha anomalía", dixo, respecto dun marco legal que considera que está "fosilizado".

"Estamos a renunciar de feito ao noso autogoberno, porque no últimos tres anos a Xunta esqueceu que ten moitas competencias que son principalmente súas, como a política industrial, e decidiu abdicar delas para pasarlle a pelota ao Estado", denunciou.

Arangüena remarcou que Galicia "é a única que leva 40 anos" sen modificar o seu estatuto e, por iso, "unha vez superada a pandemia, hai que expor esta modificación, na liña das doutrinas máis modernas, cun catálogo e unha carta de dereitos".

COMPROMISOS PROGRAMÁTICOS

Preguntado por se é unha cuestión compartida pola nova dirección do PSdeG, Arangüena defendeu que o grupo "funciona de acordo cos compromisos programáticos do PSdeG". "É un compromiso que viña da dirección e que foi asumida por esta, e que entendemos que no futuro estará asumida tamén por esta, con independencia de calquera matización que se poida facer respecto diso", sostivo.

O viceportavoz socialista defendeu, así mesmo, a lexitimidade de Caballero para seguir á fronte do grupo e, é máis, advertiu de que existe "unha campaña para negar a lexitimidade" do actual portavoz, mesmo "para seguir en política".

Arangüena lembrou que Caballero é unha persoa que ten o seu traballo, polo que non necesita un cargo político, e "ninguén lle discute o seu traballo". Ademais, "foi elixido deputado, apoiado polo 40 por cento da militancia e ten toda a lexitimidade de continuar e o deber de facelo". "Estamos a falar de alguén que pode volver mañá mesmo ao seu traballo á universidade", manifestou.

O viceportavoz parlamentario tamén sinalou que, como dixo Valentín González Formoso na campaña de primarias, "toca sumar para avanzar". "Sobre todo, non desintegrar e buscar problemas innecesarios", dixo, antes de indicar que "o socialismo en Galicia xa ten suficientes atrancos e, por tanto, non hai que buscar problemas innecesarios".

"NON MOVEU NINGUNHA FICHA"

Así mesmo, tamén subliñou que Gonzalo Caballero "non moveu ningunha ficha no grupo parlamentario" cando chegou á Secretaría Xeral. Por iso, lamentou esa "campaña" para cuestionar a súa figura, que dixo que non atribúe a ninguén concreto, pero que é algo "que obxectivamente hai" entre "determinadas voces".

"Ten toda a lexitimidade, e o deber de facelo. Se non o fixese, considero que mesmo estaría a faltar ao seu deber", apuntou o viceportavoz socialista.