O lecer nocturno deberá manter o certificado covid e só poderá validar o QR coas aplicacións oficiais
A medida mantense, polo menos, ata o 18 de decembro, tras ser autorizada polo Tribunal Superior de Xustiza.
Por Europa Press / Redacción | Santiago de Compostela | 03/12/2021 | Actualizada ás 15:33
Os establecementos de lecer nocturno seguirán obrigados a pedir o certificado covid, polo menos, ata o 18 de decembro. O Tribunal Superior de Xustiza de Galicia (TSXG) autorizou á Xunta a prorrogar este requisito para os establecementos de hostalaría nocturna, que só poderán validar o QR coas aplicacións oficiais --Passcovid de Galicia, creada pola Consellería de Sanidade--.
"Esta condición introduce seguridade xurídica e certeza nas persoas encargadas de facer a comprobación e, ao mesmo tempo, disipa na persoa que exhibe o documento calquera suspicacia sobre a almacenaxe dos datos", sinala.
A Xunta pediu especificamente que a verificación sexa "exclusivamente" en soporte telemático mediante a lectura dos códigos QR existentes na documentación esixida, o cal entrará en vigor ao día seguinte da publicación desta medida no Diario Oficial de Galicia (DOG).
Desta maneira, estará vixente a medida de presentar o certificado covid --vacinación, proba negativa ou superación da enfermidade-- para acceder a establecementos deste tipo. Os xuíces tamén autorizaron a prórroga da esixencia do certificado covid para os acompañantes e visitantes de persoas que están ingresadas en centros hospitalarios.
Iso, mentres a Xunta expón estender o certificado covid a ximnasios, hospitais de día e outras actividades pechadas, tal e como avanzou o presidente do Goberno galego, Alberto Núñez Feijóo.
Por outra banda, os xuíces basean a súa autorización á prórroga da esixencia de exhibir o certificado covid-19 nos locais de lecer nocturno "nunha tendencia epidemiolóxica de aumento de incidencia en todos os concellos de Galicia", polo que entenden que a aplicación da medida resulta "xustificada e proporcionada".
A sala tamén considera a medida idónea, é dicir, eficaz para impedir a transmisión do virus, pois, segundo numerosos estudos científicos, "a contorna de lecer en lugar pechado e o perfil de xente que acode a el, de menor idade, son factores de alta transmisión".
Ademais, lembra que "a ciencia mostrou a eficacia da vacina fronte ao risco de contaxio". Por outra banda, estima que a medida é necesaria porque "consegue manter o risco de contaxio contido, a pesar do seu carácter crecente", e permite aos establecementos exercer a súa actividade.
OUTRAS MEDIDAS
No auto tamén subliña que a obrigatoriedade de presentar o pasaporte "combínase con outras medidas das que dispón o suxeito que, polas razóns que sexa, non estea vacinado, para acceder a estes locais", tales como presentar un certificado negativo de padecer a enfermidade ou de pasala en determinadas circunstancias temporais.
O TSXG lembra que a sentenza do Tribunal Supremo do pasado 14 de setembro declarou que, aínda que este tipo de medidas poden supor "a limitación tenue dos dereitos fundamentais á intimidade e á igualdade", están xustificadas e son proporcionadas "pola concorrencia coa necesidade dunha forte salvagarda dos dereitos á vida, á integridade física e á propia saúde".
Ademais, fai referencia á recente sentenza do Tribunal Supremo, do pasado 1 de decembro, na que anula unha resolución do Tribunal Superior de Xustiza do País Vasco denegatoria destas mesmas medidas de control de acceso a establecementos de lecer nocturno.
No fallo, o alto tribunal descarta que supoñan unha desproporcionada limitación doutros dereitos fundamentais, pois lembra que "nin o dereito de reunión supón a facultade de exercelo en calquera lugar e circunstancia nin, desde logo, é obstáculo a que se pida este documento para acceder aos locais nas condicións de pandemia existentes".
O Supremo engadiu que "outro tanto pode dicirse das liberdades de circulación e das de expresión artística: nin o seu exercicio esixe o acceso incondicionado a establecementos de lecer e restauración nin requirir o certificado supón unha inxerencia neles que entrañe unha limitación inasumible".
O pasaporte covid, vixente tamén para os albergues de peregrinos con habitacións compartidas, esíxese só aos maiores de 12 anos, para o colectivo que por agora tivo acceso á vacinación.
