G. Caballero dá a batalla ata o último día e critica o veto da súa lista no XIV Congreso do PSdeG
Presentada outra lista que encabeza a deputada Noa Díaz e na que hai varios rexedores.
Por Europa Press / Redacción | SANTIAGO DE COMPOSTELA | 08/12/2021 | Actualizada ás 10:41
O portavoz parlamentario do PSdeG, Gonzalo Caballero, instou ao novo secretario xeral, Valentín González Formoso, a "permitir a participación" tras ao veto ás súas listas para os órganos nacionais e federais por parte da comisión organizadora do XIV Congreso.
"O Partido Socialista debe ser referencia de democracia interna e garantías democráticas. A pluralidade e o respecto ás normas democráticas son cuestións fundamentais e sostidas polo marco constitucional e legal", sinala nunha mensaxe publicada a través do seu perfil da rede social Twitter.
O socialista indica que presentou "en prazo" as candidaturas ao comité nacional e ao federal e denuncia que "queren impedir que se voten" coa "escusa de que foron presentadas por correo remitido á organización".
Gonzalo Caballero sostén que o dereito á participación política "é fundamental" en democracia. "Negar a representación do 40% da militancia é un retroceso", indica na mensaxe, no que lembra que mesmo nas primarias utilizan o correo electrónico para presentar as candidaturas.
En concreto, os afíns ao portavoz parlamentario, Gonzalo Caballero, presentaron candidaturas alternativas tanto ao comité nacional como ao federal ao finalizar sen acordo as negociacións durante a primeira xornada do XIV Congreso Nacional do PSdeG. Con todo, a comisión organizadora da cita non dá por válidas estas listas ao considerar que presentan "múltiples irregularidades".
En concreto, o portavoz parlamentario do PSdeG encabeza unha lista alternativa formada por sete persoas para o comité federal, na que figuran no número dous e tres os deputados Paloma Castro e Martín Seco, respectivamente. Ademais, pecha a candidatura Luís Toxo.
Pola súa banda, a deputada autonómica Noa Díaz é a número un doutra lista alternativa --conformada por 228 persoas-- ao comité nacional, e na que figuran nos primeiros postos nomes como os dos alcaldes de Cedeira (A Coruña), Pablo Moreda; Forcarei (Pontevedra), Verónica Pichel; e Pedrafita do Cebreiro (Lugo), José Luís Raposo. Para obter representación de ser validadas, estas terán que alcanzar un 20% de apoio no XIV Congreso, no que hai un total de 491 delegados acreditados.
Ata pasadas as doce da noite non se materializou o rexistro destas listas tras haber diferenzas no formato de inscrición. Así, a comisión organizadora do XIV Congreso do PSdeG sinalou que estas debían presentarse de forma física e non por correo electrónico, como fixeran os afíns a Caballero.
Ademais, considera que estaban fóra de prazo, tanto do inicial como da prórroga concedida a petición dos de Gonzalo Caballero, e que presentaban "múltiples irregularidades", aspectos que, segundo apuntaron fontes socialistas, fan que non se poidan dar por válidas.
