O Porto da Coruña prevé acabar o ano cun crecemento do 10% en tráficos, pese ao descenso da pesca
O seu presidente destaca o diálogo entre as administracións para a firma do convenio sobre os peiraos e o acceso ferroviario.
Por Europa Press / Redacción | A CORUÑA | 14/12/2021 | Actualizada ás 17:25
O presidente da Autoridade Portuaria da Coruña, Martín Fernández Prado, destacou o crecemento do porto, pese ao contexto de pandemia, e asegurou que as "expectativas son boas", cunha previsión de crecemento dos tráficos para final de ano de entre o 9 e o 10%.
Isto será, segundo apuntou nunha comparecencia ante os medios, a pesar do descenso do tráfico de pesca, dun 15% en relación ao ano anterior, un dato que Fernández Prado admitiu que é "preocupante".
Por outra banda, manifestou que espera que a firma do convenio para o acceso ferroviario ao porto exterior, en Langosteira, sexa en xaneiro, de forma que estea adxudicado no verán e póidanse empezar as obras o próximo ano.
Fíxoo nunha rolda de prensa para facer balance do exercicio, tras o seu primeiro ano á fronte da presidencia do organismo portuario, entre as que destacou como principais fitos os fondos europeos conseguidos para financiar o tren ou a apertura ao público do peirao de transatlánticos.
Na súa comparecencia, destacou o clima de diálogo entre as administracións sobre a transformación urbana dos espazos portuarios e o refinanciamento da débeda do organismo portuario, contraída polas obras do porto exterior.
Noutra orde de cousas, destacou a recuperación dos tráficos pese ao contexto de pandemia e asegurou que espera que acabe o ano cun aumento do 10%. Tamén avanzou que en próximas semanas anunciarase a captación de novas concesións. Así mesmo, informou de que se solicitaron para o próximo ano 175 escalas de cruceiros, "cun impacto de 20 millóns de euros na cidade", expuxo sobre as previsións a este respecto.
