Rescatado un escalador con fracturas no Parque do Xurés

Os servizos de emerxencia rescataron un escalador que resultou ferido cando practicaba este deporte no coto das Gralleiras, no Parque Natural do Xurés, en Muíños (Ourense).

Segundo informou o CIAE 112, pasaban das 16,30 horas cando un home contactou ao 112 Galicia para dar conta do suceso e avisar de que o escalador necesitaba asistencia médica urxente tras caer desde unha altura. Ademais, explicou que se atopaba nunha zona de rochas de difícil acceso.

Ante iso, desde o Centro Integrado de Atención ás Emerxencias 112 Galicia púxose en marcha un operativo que contou coa intervención dos profesionais sanitarios, do GES de Muíños, da Garda Civil e dos voluntarios de Protección Civil da localidade.

Xa no lugar, os equipos de intervención confirmaron ao 112 Galicia que o home presentaba varias fracturas e que procedían á súa evacuación ata Portela de Pitões, onde os esperaba unha ambulancia para o traslado ao centro hospitalario de referencia.