O PPdeG carga contra o Goberno central por non "procurar solucións" para a comarca de Ferrol

O secretario xeral do PPdeG, Miguel Tellado, esixiu ao Goberno de Sánchez que se "involucre" na procura de solucións para a comarca de Ferrol, ao afear ao Executivo central que non respondese ao documento sobre o pacto de Estado para esta zona.

Fíxoo ao responder a unha pregunta sobre a designación da ata agora portavoz adxunta no grupo municipal do PP en Ferrol, Martina Aneiros, como nova delegada territorial da Xunta nesta comarca. Nela, Tellado argumentou que a súa designación e a creación da delegación territorial é "unha gran decisión para unha comarca tan castigada", á vez que cualificou a Aneiros como unha persoa "moi preparada".

Ao fío deste nomeamento, demandou a todas as administracións, en especial ao Goberno, a súa implicación na procura de "solucións" para esta zona. "Lamentamos que desde a chegada de Sánchez o proxecto das fragatas 110 se conxelara", expuxo, criticando tamén ao Goberno por non "responder" o documento sobre o pacto de Estado por Ferrol remitido pola Xunta.

"Nós estamos a traballar por Ferrol aínda que o Goberno do Estado non apareza", dixo reprochando tanto ao alcalde desta cidade, Ángel Mato, como ao secretario xeral do PSdeG, Valentín González Formoso, que non "alcen a voz" en demanda de solucións.

Xa sobre a designación da nova delegada territorial, e preguntado se se busca a súa proxección política, dixo que unha lectura dese tipo non ten "sentido".