A Deputación de Pontevedra garante a continuidade do plan para recuperar os xacementos galaico-romanos

O pleno ordinario da Deputación de Pontevedra debateu unha moción presentada polo Partido Popular para que a administración provincial asuma directamente a recuperación de 18 xacementos arqueolóxicos galaico-romanos da provincia "no caso de que o Ministerio de Fomento suspenda as seguintes fases". A iniciativa foi rexeitada cos votos do Goberno provincial (PSdeG e BNG), que respondeu ás dúbidas expostas pola oposición para garantir a continuidade do plan.

O vicepresidente da Deputación, o nacionalista César Mosquera, mostrouse sorprendido por esta "moción preventiva", mentres que o portavoz do grupo socialista e deputado de Economía e Facenda, Carlos Font, expresou a súa "incredulidade" pola actitude do PP "que asume como propios os argumentos dun colectivo e lánzase como kamikaze a unha moción incongruente co seu pasado". O socialista sostén que este protocolo foi asinado en 2015 polo anterior presidente provincial, o popular Rafael Louzán e, "entre outros defectos", carecía de asignacións orzamentarias, planificación ou calendario.

O portavoz do grupo provincial do PP, Jorge Cubela, expresou a "dobre preocupación" do seu partido con respecto ao futuro dos xacementos arqueolóxicos da provincia, polo "atraso manifesto e evidente" nos traballos de recuperación e posta en valor, así como tamén polas "recentes mostras do Goberno central que di ter dúbidas para continuar coas seguintes fases do protocolo".

O PP pretendía que, "no caso de que finalmente o Ministerio incumpra a súa parte", a Deputación aprobase un plan propio para pór en valor os castros da provincia. Cubela incidiu en que, "o lóxico sería reclamar e defender estes investimentos, pero a experiencia dinos que non o van a facer".

COMPETENCIA DA XUNTA

López Font replicou que é a Xunta de Galicia quen debería estar a recuperar os xacementos, en virtude das competencias sobre patrimonio histórico-artístico que lle atribúe o Estatuto de Autonomía de Galicia.

Por último, Font anunciou que, unha vez finalizada a primeira fase do protocolo coa recuperación dos castros de Alobre (Vilagarcía), Toiriz (Silleda) e A Subidá (Marín) xa están en revisión outros 11 proxectos de musealización, seguindo as directrices da Dirección Xeral de Patrimonio da Xunta de Galicia.

PÉSAME POLO FALECEMENTO DE EVA GARCÍA DE LA TORRE

O Pleno sumouse de forma unánime á declaración de pésame da presidenta da Deputación tras o "duro golpe" polo falecemento da exalcaldesa do Porriño, Eva García de la Torre.

Ao comezo do Pleno, Carmela Silva, "como presidenta e como amiga de Eva", enviou "un forte abrazo á familia da primeira muller alcaldesa do Porriño". A mandataria provincial quixo estar no comezo da sesión plenaria pero abandonouna deseguido para dirixirse ao tanatorio.

REDE DE CIDADES SAUDABLES

A Deputación tamén aprobou este venres por unanimidade a adhesión á Rede de Cidades Saudables, promovida polo Ministerio para a Transición Ecolóxica e a Federación Española de Municipios e Provincias (FEMP).

O acordo permitirá acceder ás axudas, por importe global de 18 millóns de euros no próximos tres anos, para desincentivar o uso dos vehículos privados e promover formas alternativas de mobilidade fomentando a execución de carrís bici e infraestruturas para a realización de actividade física ao aire libre, así como de rutas e circuítos saudables.