O PP de Pontevedra reitera que "os responsables políticos do 'caso cuñada' están no PSOE" e deben dimitir
Esixe á presidenta da Deputación, Carmela Silva, que ofreza explicacións e que presente a dimisión.
Por E.P. | Pontevedra | 03/02/2022 | Actualizada ás 17:43
O grupo provincial do Partido Popular reiterou a súa petición dun Pleno de carácter extraordinario na Deputación de Pontevedra para que a presidenta, Carmela Silva, ofreza explicacións polo que denominaron "caso cuñada" e esixiron, unha vez máis, a dimisión da mandataria provincial "e de todos os responsables políticos que puideron participar nesta trama".
O deputado portavoz do PP provincial, Jorge Cubela declarou que "hoxe máis que nunca está claro que todo queda en casa do PSOE" xa que son, segundo enumerou, "un afiliado, unha cuñada, un alcalde, unha tenente de alcalde, unha presidenta da Deputación, unha presidenta do PSdeG, e moitos cargos socialistas".
Parafraseando á famosa frase da obra 'Hamlet', de William Shakespeare, Jorge Cubela proclamou que "cheira a podrecido no PSOE de Vigo, cheira a podrecido no PSOE da provincia de Pontevedra e cheira a podrecido no PSOE de Galicia", en referencia á solicitude de indulto presentada "xustificándose en que é un militante socialista" algo que cualifican como "unha vergoña, un insulto á cidadanía, ao sistema e ás institucións".
O PP quere aclarar "quen deu as ordes para orquestrar esta trama política" e esixiu "que se esclareza a verdade de todo o que pasou" para saber "que pacto pode haber detrás desta solicitude de indulto", segundo suxeriu Cubela: "non delatas a Carmela Silva e a cambio recibes o indulto?".
Para o Partido Popular "o PSdeG indultou a Carmela Silva nomeándoa presidenta dos socialistas galegos, e agora temos que indultar xudicialmente un condenado cunha pena de máis de cinco anos de prisión".
