Os hospitais galegos ofrecerán apoio emocional e legal ás vítimas de accidentes de tráfico e familiares
O titular de Sanidade, Julio García Comesaña, doou sangue na unidade móbil desprazada ao complexo administrativo da Xunta de Galicia en San Lázaro, acompañado pola directora da Axencia de Doazón de Órganos e Sangue (ADOS), Marisa López García.
Por E.P. | SANTIAGO DE COMPOSTELA | 09/02/2022 | Actualizada ás 19:50
O conselleiro de Sanidade, Julio García Comesaña, anunciou que as vítimas de accidentes de tráfico e os seus familiares recibirán apoio emocional e orientación legal e sociosanitaria nos hospitais galegos, grazas a un convenio asinado entre o Sergas e a Fundación A.
Para analizar a implantación deste acordo, o titular de Sanidade reuniuse este mércores, con Teresa Vello e Inocencio Gutiérrez, representantes da Fundación A Vítimas de Tráfico, dedicada ao apoio e asistencia das persoas afectadas por accidentes de tráfico. Estiveron acompañados tamén polo xerente do Servizo Galego de Saúde, José Flores, e pola vicexerente, Mercedes Castro.
Con este acordo, a Xunta comprométese a "facilitar espazos e acceso" aos responsables sanitarios nos hospitais da rede pública galega para que poidan ofrecer ás vítimas apoio emocional, con persoal especializado en psicoloxía de emerxencias; orientación legal e sociosanitaria, para o exercicio dos seus dereitos legais e o acceso a prestacións sociais e sanitarias.
"NECESIDADE DE DOAZÓNS"
Doutra banda, o titular de Sanidade doou sangue na unidade móbil desprazada ao complexo administrativo da Xunta de Galicia en San Lázaro, acompañado pola directora da Axencia de Doazón de Órganos e Sangue (ADOS), Marisa López García.
Durante este acto, Comesaña destacou "a necesidade de doazóns" e apelou ao "altruísmo e a xenerosidade" da poboación. "Galicia alcanza diariamente a cifra de entre 400 e 500 doazóns de sangue, feito que posibilita o desenvolvemento do labor asistencial da comunidade", segundo indica o comunicado da Consellería.
Por este motivo, lembrou que todos os cidadáns que desexen doar poden facelo nos puntos permanentes das sete grandes cidades galegas ou nalgunha do dez unidades móbiles que se desprazan, ao longo da semana, a máis de corenta concellos da comunidade.
Máis información de ADOS en www.ados.sergas.gal , o teléfono gratuíto 900 100 828, a través do correo electrónico doadoressangue.ados@sergas.gal. ou nas súas redes sociais.
