Pontón critica ao PP por "abrirlle a porta a unha formación machista, racista e antigalega"

A portavoz nacional do BNG, Ana Pontón, reflexionou este luns sobre os resultados electorais de Castela e León para advertir de que cando "se blanquea a extrema dereita, ten como consecuencia que se normaliza" e, en segundo lugar, mostrar a súa "preocupación" polo "retroceso das forzas progresistas".

Tras ironizar con que (Alberto Núñez) "Feijóo non lle foi de moita axuda" a Mañueco, ao "non conseguir os obxectivos que se expuñan", fixo unha primeira "reflexión" sobre o avance de Vox na comunidade veciña. "Blanquear a extrema dereita ten como consecuencia que se normaliza. Se lle abres a porta, acaba entrando, é un camiño que é moi difícil reverter", sinalou.

Pontón apuntou, así mesmo, que ademais de "preocuparlle moito esta situación", o PP "debería reflexionar" sobre "abrir de pao a pao" a porta a unha formación "machista, racista e antigalega".

E en segundo termo, preocupoulle "ver "o retroceso de forzas progresistas", algo que atribúe a que haxa certa "decepción" entre a cidadanía, que estea "defraudada" porque "non se está cumprindo o que se prometeu". "Por iso é moi importante non defraudar", salientou.

Preguntada por se se refire en concreto á reforma laboral, dixo que con esta cuestión deixouse unha mensaxe, cando "derrogar" a norma era unha promesa electoral e "había quórum para devolver os dereitos" aos traballadores. "A min preocúpame que sexa igual de barato despedir cun goberno do PSOE e Podemos que cun goberno do PP e débese tomar nota, porque algo está a pasar", apuntou, en relación a ler os resultados das eleccións en Castela e León máis aló da clave autonómica.

A portavoz nacional do BNG, Ana Pontón, participa nun acto simbólico de denuncia da exclusión financeira en Galicia, a 7 de febreiro de 2021, na Coruña. M. Dylan - Europa Press | Fonte: Europa Press