Un cento de deportistas participan nun Campionato Galego de Campo a Través Adaptado "sen barreiras"
Pontevedra acolle unha competición na que participan deportistas procedentes de 12 clubs autonómicos (4 da Coruña e 8 de Pontevedra).
Por Galicia Confidencial | Santiago de Compostela | 23/02/2022 | Actualizada ás 12:10
O deporte sen barreiras, tomará o contorno do parque da Illa das Esculturas e a Xunqueira da Gándara coa celebración do XXVII Campionato Galego de Campo a Través Adaptado, organizado pola Federación Galega de Deporte Adaptado en colaboración coa Concellería de Deportes.
Un centenar de deportistas federados encadrados en clubs da Federación participarán hoxe neste evento entre as 11:00 e as 13:00 horas, nas categorías masculina e feminina de competición, adaptada e cubrindo distancias de 500, 600, 1.000, 1.500, 2.100 e 3.200 metros.
Os competidores distribuiranse por categorías do seguinte xeito: 5 en competición +15 (maiores de 15 anos) e 2 en competición con parálise cerebral, que percorrerán 3.200 metros; 3 en competición +15F e 25 en adaptado +15M, que deberán completar 2.100 metros.
8 participantes en adaptado +15F, cunha distancia de 1.500 metros; 38 en xogo +15M e 20 en xogo +15F, cun percorrido de 600 metros, e un en xogo -15M, que afrontará un itinerario de 500 metros. O circuíto estará axeitadamente sinalizado e contará con voluntariado identificado para colaborar, así como ambulancia e servizo médico.
O Campionato de Campo a Través foi presentado esta mañá no Concello de Pontevedra nun acto no que participaron o tenente de alcalde e concelleiro de Deportes, Tino Fernández, e a secretaria da Federación Galega de Deporte Adaptado, Susana García Senra.
O edil do PSOE asegurou que, de entre as numerosas actividades e eventos deportivos impulsados polo seu departamento, "poucas veces asisto a unha rolda de prensa tan emocionado como á de hoxe, porque seren capaces de colaborar para que tódalas persoas poidan facer deporte e participar nun campionato, é un motivo de orgullo e satisfacción".
Os participantes proceden de toda Galicia, pero esencialmente da provincia de Pontevedra, representando a 12 clubs autonómicos (4 da Coruña e 8 de Pontevedra). Segundo indicou García Senra, "os deportistas serán recibidos ás 10:00 horas, realizando un percorrido para coñecer o circuíto de cada categoría, e as carreiras dará comezo ás 11:00 horas", estando prevista a entrega de premios para as 13:00 horas.
