A Xunta deseña un xogo en liña para ensinar aos mozos a protexerse ante incendios, inundacións ou accidentes

A Axencia Galega de Emerxencias (Axega) está a distribuír entre os centros de Educación Secundaria de Galicia material lúdico-didáctico para promover a cultura da prevención entre os mozos. Esta oferta, que chegará aos centros de maneira telemática, inclúe un xogo en liña cuxo obxectivo é formar e sensibilizar sobre a importancia da autoprotección en casos de emerxencia.

Ademais, este xogo dispón dunha clasificación final cos centros que consigan a maior puntuación ao responder correctamente todas as preguntas que se formulan.

Para iso, contarán con material audiovisual e informativo de apoio, co que poderán traballar na aula, á vez que amplían os seus coñecementos sobre o número único de atención ás emerxencias 112 e aprenden a protexerse ante situacións de risco tales como incendios forestais, inundacións e accidentes no fogar.

Calquera centro que o desexe poderá participar nesta actividade, con especial atención a aqueles situados en zonas fronteirizas con Castela-León e Portugal, pois existe un apartado destacado para o coñecemento do protocolo de resposta e cooperación transfronteiriza en caso de emerxencias graves ou catástrofes.