A Xunta presenta un “ticket social” para as familias máis pobres
Di que servirá para que máis de 14.000 fogares poidan ter reducións de ata un 40% na súa factura eléctrica. Destinará un millón de euros, a mesma cantidade que custa unha soa campaña en medios.
Por Xurxo Salgado | Compostela | 23/05/2014 | Actualizada ás 16:00
“Ticket eléctrico” ou iso é, cando menos, a denominación que Alberto Núñez Feijóo lle acaba de dar a unha nova axuda que o seu goberno quere darlle ás familias máis desfavorecidas. “Trátase dun ticket social que ten coma obxectivo reducir o custe da factura da luz para as familias con más problemas”, dixo.
Foi na rolda de prensa posterior ao Consello da Xunta, na que anunciou que, con esta medida, se poderán beneficiar 14.000 familias galegas con fillos pequenos e cuxos ingresos medios non superen o INPEM (Indicador Público de Renta de Efectos Múltiples). En total, o aforro que poden acadar no recibo da luz é dun 40%, contando tamén coas axudas estatais.
As axudas
Este “ticket eléctrico” consistirá en unha axuda de 90 euros para familias desfavorecidas ou 120 se, ademais, son familias numerosas. A súa duración será dun ano e o pago será semestral. “Logo dese ano xa veremos a evolución da crise en Galicia e en España para tomar unha decisión ao respecto”, indicou Feijóo.
Para acadar este obxectivo, a Xunta destinará un millón de euros, os mesmos que destinará a Consellería do Medio Rural e do Mar para publicitar nos medios galegos os produtos do país.
