A Confederación de Empresarios afirma que Galicia perde "o seu activo máis importante en xestión" coa marcha de Feijóo

A Confederación de Empresarios de Galicia (CEG) constatou este luns que Galicia perde, coa próxima marcha de Feijóo da Xunta, "o seu activo máis importante en xestión e 'sentidiño'", e desexou ao mandatario galego "toda serie de acertos e éxitos" no seu desembarco na dirección nacional do PP, que se confirmará, salvo sorpresa, no congreso extraordinario do partido a principios abril.

Así o trasladou o presidente da Confederación, Juan Manuel Vieites, quen dixo: "Se un galego, unha vez máis, marcha á capital do reino, e iso supón que os cidadáns poidan convivir mellor e as cousas vaian menor, benvido sexa".

Vieites cualificou como "moi acertada" a decisión de Núñez Feijóo de optar á presidencia do PP, e valorou "que queira equilibrar a situación de crispación", para que "os partidos de Goberno pensen nos cidadáns".

VOX

O vicepresidente político de Vox, Jorge Buxadé, evitou este luns valorar como poden ser as relacións coa nova dirección do Partido Popular que encabece o actual presidente da Xunta, Albert Núñez Feijóo, e emprazou a agardar feitos concretos para poder xulgalo.

"Polos seus froitos coñecerédelo", evocou Buxadé recorrendo a unha cita evanxélica e eludindo así entrar en debate polas palabras do eurodeputado Esteban González Pons dicindo que Vox é de extrema dereita ou as cautelas que, en cambio, mostrou Núñez Feijóo.

"As etiquetas e palabrñas non significan nada", sostivo baixo a convicción de que se utilizan para "tentar agredir" pero asegurando que a Vox lle dan igual. "As etiquetas dan igual. Se non se utilizan agradécese, pero non demos tanta importancia ás palabras, senón ás políticas que se queiran facer", pediu.

Neste marco, Buxadé confirmou que as negociacións co PP para formar Goberno en Castela e León están "vivas" e confían en chegar a un acordo "en bos termos" para os seus cidadáns, incluíndo a Mesa das Cortes que debe constituírse este xoves.