Detido na Coruña por coaccionar a unha menor para que lle mandara vídeos eróticos
O home, que chegou a ameazar á rapaza, enfróntase a varios delitos.
Por E.P. | SANTIAGO DE COMPOSTELA | 09/03/2022 | Actualizada ás 12:04
A Garda Civil detivo na Coruña a un individuo como presunto autor dos delitos de ameazas, coaccións e corrupción de Menores. A detención levou a cabo o pasado martes, 8 de marzo, no marco da 'Operación Silenciada', dirixida polo Equipo de Persoas da Unidade Orgánica de Policía Xudicial da Garda Civil de Ávila e o detido pasou a disposición xudicial do Xulgado de Garda da Coruña.
A principios de novembro do pasado ano, a Garda Civil tivo coñecemento de que un home podería estar a manipular a unha menor de idade para que esta lle enviara vídeos de contido sexual. A partir dese momento, os axentes do Instituto Armado inician a 'Operación Silenciada', na que se realizan unha serie de análises informáticas forenses, mediante os cales se puido descubrir, que este individuo contactou cunha menor a través dunha plataforma de mensaxería. A través desta plataforma, o detido comezou a ofrecerlle agasallos a cambio de vídeos de índole sexual.
Segundo explicou a Garda Civil nun comunicado, a menor accedeu ao envío desas imaxes. Posteriormente, o acusado destes delitos pediulle máis vídeos, pero nesta ocasión esixíalle que fosen mantendo relacións sexuais con outras persoas. A menor negouse e o individuo comezou a coaccionarla baixo a ameaza de publicar os vídeos en redes sociais e con facer dano á súa familia se non accedía ao envío desas imaxes. Tras isto, o detido publicou o contacto da vítima nunha aplicación de citas, polo que comezou a recibir chamadas de persoas que pretendían manter relacións sexuais con ela.
DETENCIÓN E REXISTRO
Por mor da investigación e ás xestións policiais levadas a cabo, foi localizado e detido na Coruña o presunto delincuente. Alí, levouse a cabo o rexistro do domicilio do detido, no que se incautaron discos duros, material electrónico, xoguetes eróticos e disfraces. O detido xa foi posto a disposición do xulgado de instrución de garda da Coruña e o material informático intervido continúase estudando por se houbese outras vítimas.
