O sector agrogandeiro galego alerta da falta de recollida de produtos como o leite debido á folga de transporte
Carne, leite ou produtos de horta poden quedar sen recoller e isto apunta a perdas para os e as produtoras.
Por Europa Press / Redacción | SANTIAGO DE COMPOSTELA | 16/03/2022 | Actualizada ás 18:24
Organizacións agrarias e cooperativas alertaron dos problemas que carrexa para o campo galego o paro no transporte, xa que a industria deixará de recoller leite desde este xoves, 17 de marzo, á vez que se viven "dificultades" para abastecer a supermercados de carnes --como pito e porco-- e produtos de horta. En rolda de prensa conxunta en Santiago de representantes de todo o sector, o secretario xeral de Unións Agrarias, Roberto García, advirte de que se non hai unha solución inmediata, viviranse situacións "dramáticas", entre as que citou "mortes de animais" por falta de alimentación.
Tras deixar claro que se mostran "comprensivos" co dereito a folga dos transportistas, reclamou que se cumpran cos servizos mínimos de recollida de leite e alimentos perecedoiros. Explica que gandarías intensivas de porcos e pitos están ao "límite de non ter alimentación" para os animais. Tamén no caso dos rumiantes hai problemas coa chegada de materia primas para a fabricación de pensos. "Hai zonas onde xa hai problemas de abastecementos", di Roberto García sobre a falta de materia prima para eses pensos necesarios nunhas 2.500 granxas de porcos, coellos e pitos.
Nesta liña, García sostén que esa protesta de transportistas non pode "ser á conta de dificultade de abastecemento de alimentación" da sociedade. Así, "preocupa" o anuncio de que as industrias deixarán de mandar camións a recoller leite, dado que a capacidade de almacenamento das explotacións "apenas chega a dous días".
Precisamente, a industria láctea española anunciou que se ve abocada a suspender a súa actividade trasformadora como consecuencia da folga de transportes que vén desenvolvendo no tres últimos días en España, segundo informou a Federación Nacional de Industrias Lácteas (Fenil) nun comunicado.
SERVIZOS MÍNIMOS
Nesta liña, o presidente da Asociación Agraria de Galicia, Francisco Bello, sinalou que "non pode ser que non se estableceron uns servizos mínimos" pola "improvisación". Empraza a que haxa diálogo e que "non morra un só animal por falta de alimentación". Respecto diso, o responsable de Agaca, Higinio Mougán, lanzou unha petición á Delegación do Goberno co fin de que poña en marcha "convois" para que se garanta o traballo de transportistas que non están de folga e que "non se paralice o sector". "Estamos achegándonos día tras día a unha situación catastrófica", avisa.
Pola súa banda, a secretaria xeral do Sindicato Labrego, Isabel Vilalba, deixa claro que esta é unha situación "realmente crítica", polo que pide garantir as "necesidades vitais de seres vivos", o que ten que estar recolleito nuns servizos mínimos, igual que a saída de alimentos perecedoiros. Igualmente, o coordinador da Federación Rural Galega (Fruga), Manuel Dacal, chama á "intervención" das administracións para buscar solucións, nun contexto de "treboada perfecta" que pode levar a que "moitas explotacións se vexan obrigadas a pechar".
EMPRESAS FAMILIARES ENVÍAN UNHA CARTA A SÁNCHEZ
A Asociación Galega da Empresa Familiar (AGEF) dirixiu unha carta ao presidente do Goberno, Pedro Sánchez, na que lle pide ao presidente do Goberno, Pedro Sánchez, articular as medidas necesarias e "urxentes" ante a subida do prezo do combustible, de forma que "se poña fin" ao paro do transporte que "tan graves prexuízos está causado ao tecido empresarial galego".
Esta entidade, integrada por 58 empresas con sede social en Galicia, expón como as compañías ven afectadas pola folga do transporte. O empresariado subliña que urxe tomar medidas pero non a medio ou longo prazo, senón que "teñen que ser inmediatas como fixeron países veciños como Portugal ou Francia". Propoñen a baixada do prezo do combustible e axudas directas ou redución dos impostos asociados aos carburantes.
CENTRO DE COORDINACIÓN DE SEGURIDADE
Ademais, o Goberno comprometeuse a crear un Centro de Coordinación de Seguridade para garantir que as empresas transportistas que non secundan o paro, que serían a maioría segundo o Executivo, poidan continuar co seu traballo e abastecer as industrias, supermercados e resto de actividades produtivas.
Así o avanzou o presidente da Asociación de Transporte Internacional por Estrada (Astic), Marcos Bastante, que esixiu ao Goberno que garanta a seguridade necesaria para que as empresas que non secundan o paro poidan desenvolver a súa actividade laboral con normalidade. Segundo Basante, isto non está a suceder en varios puntos loxísticos estratéxicos, debido "á violenta acción dalgúns piquetes, que están a provocar graves disturbios, cortando estradas e accesos a zonas de carga e descarga, picando pneumáticos de camións ou rompéndolles lúas".
