Yolanda Díaz, contra a receita de Feijóo, defende un imposto extra ás eléctricas e conxelar aluguer
"Esta guerra é de longo percorrido e é probable que o impacto sexa significativo. A subida dos prezos da enerxía e a inflación contaxia a toda a economía", di.
Por Europa Press / Redacción | MADRID | 17/03/2022 | Actualizada ás 09:48
A vicepresidenta segunda do Goberno e ministra de Trabajo e Economía Social, Yolanda Díaz, defendeu este xoves a necesidade de conxelar os prezos dos alugueres ante a escalada do IPC, así como a implantación dun imposto extraordinario ás eléctricas, tal e como propón Unidas Podemos.
Díaz, en declaracións a RNE recollidas por Europa Press, afirmou que o escenario que abriu a guerra e a subida dos prezos da enerxía e do IPC é "complexo" e terá un impacto "significativo" na economía e no emprego. "Esta guerra é de longo percorrido e é probable que o impacto sexa significativo. A subida dos prezos da enerxía e a inflación contaxia a toda a economía. Será un impacto forte na economía e no emprego, pero non temos datos a día de hoxe da afectación do emprego", precisou.
A ministra defendeu as propostas de Podemos de conxelar o prezo do aluguer e de instaurar un imposto extraordinario ás eléctricas para axudar a paliar as consecuencias sociais e económicas desta nova crise que se abriu coa invasión rusa de Ucraína, e advertiu dunha rebaixa xeneralizada como a que propugna o PP é "inadecuada" nun contexto de guerra.
"O PP sempre dá a mesma receita para calquera situación: baixada xeneralizada dos impostos. Eu onte estiven reunida con 60 economistas e o consenso é que unha baixada xeneralizada de impostos nun contexto de guerra non é adecuado porque os servizos públicos se sosteñen con ingresos públicos", subliñou.
Así, sinalou que, con esta proposta dos 'populares', o que se expón é "ou soster o Estado de Benestar ou incrementar o déficit e a débeda pública". Por iso, "bota de menos" que o PP "non poña a mirada" nos beneficios das empresas cotizadas, que en 2021 gañaron 64.000 millóns de euros, unha cifra "histórica". "Neste contexto de crise teñen que redistribuírse eses beneficios. As tres grandes eléctricas incrementaron un 47% os seus beneficios antes de impostos en 2021, con 10.022 millóns de euros, e teñen que contribuír a esta crise", defendeu a vicepresidenta segunda.
Yolanda Díaz reta o PP a demostrar que defende unha mellora de servizos públicos dado que, ata agora, só viu por parte dos populares "poñerlle a alfombra vermella a Vox". Ademais, salientou que o relevante para ese consenso son as propostas e, nesta liña, ve evidente que coas forzas do bloque de investidura coinciden en diagnosticar os problemas da cidadanía, como os problemas para pagar os alugueres.
Por tanto, as medidas a adoptar para o plan nacional de resposta á crise provocada pola guerra de Ucraína teñen que ser "eficaces", "rápidas" e permitir unha "igualación social". E nesa liña reivindicou que o seu espazo aspira a conxelar os alugueres para este ano e que chegou a hora de incorporar un imposto extraordinario para as eléctricas.
