Diego Liñares, a piques de pasar as semifinais de 60m valos no campionato de España
Converteuse no primeiro deportista do MillaRaio en estar nunha proba nacional.
Por Galicia Confidencial | Santiago de Compostela | 25/03/2022 | Actualizada ás 17:00
O pasado sábado 12 de marzo, o corredor Diego Liñares participou en Antequera no campionato de España sub20 en pista cuberta, o que o converteu no primeiro deportista do MillaRaio en estar nunha proba nacional sub20.
Liñares quedou a piques de pasar as semifinais nos 60 metros valas. Ademais, na mesma fin de semana, o MillaRaio conseguiu tres medallas nos campionatos sub16, sub18 e sub20 de lanzamentos longos, e oito atletas estiveron nos galegos de pista cuberta sub10, sub12 e sub14.
No campionato galego, o pasado domingo 13, o MillaRaio acadou bos resultados nos lanzamentos longos celebrados no Centro Galego de Tecnificación Deportiva de Pontevedra. O club conseguiu tres metais nunha xornada con moito vento e chuvia, que dificultou que os deportistas participantes mellorasen as súas marcas persoais.
Nuno Castro gañou a proba de xavelina de 600 gramos sub16, conseguindo malia as condicións meteorolóxicas o seu mellor rexistro persoal, cun lanzamento de 37,94 metros. Tamén na categoría sub16, Pablo Cariñena levou o bronce en disco dun quilo sub16, chegando ata os 26,58 metros.
A participación sub18 tamén foi positiva, destacando a prata conseguida por Alfonso Labella no seu debut co martelo de 5 quilos, acadando os 41,50 metros. Ademais, o atleta sumou a esta actuación un sexto posto en xavelina de 700 gramos. Na modalidade de disco 1Kg, Julia González foi quinta, mentres que Álex Cabo foi sexto en xavelina de 600 gramos.
