UGT rebélase contra o Goberno por unhas medidas "insuficientes" contra a crise de prezos
Con todo, o sindicato asegura que van "na boa dirección".
Por E.P. | SANTIAGO DE COMPOSTELA | 31/03/2022 | Actualizada ás 13:45
O secretario xeral de UGT, Pepe Álvarez, manifestou que as medidas tomadas polo Goberno respecto da crise provocada pola guerra en Ucraína van na "boa dirección", aínda que as considerou "claramente insuficientes". Álvarez fixo estas declaracións antes de presidir na Coruña unha asemblea informativa con delegados sindicais. En declaracións aos medios antes de participar na reunión, o representante de UGT manifestou que lles gustou participar "máis directamente" na elaboración destas medidas.
Tamén destacou que as familias que están a vivir co salario mínimo interprofesional "con toda seguridade" tiñan que ser obxecto de "algunha axuda" para poder amortizar os "incrementos tremendos" que se están producindo nos prezos en xeral e, en particular, nos da enerxía. Respecto das pensións, Álvarez lembrou que se revalorizan de acordo co IPC "grazas á insistencia e ao traballo" das organizacións sindicais. "Tivemos que suar, non foi nada fácil", recalcou.
Mentres, dixo que os mozos deben ser "plenamente conscientes" de que se trata dun sistema que "nestes momentos" vai garantir que cando chegue a súa idade de xubilación van acceder a unha pensión "digna". O secretario xeral de UGT analizou tamén a reforma laboral, da que destacou que chega tras unhas "intensas" negociacións e un proceso parlamentario "moi complexo" e valorou os seus efectos como "indiscutiblemente moi bos".
Álvarez argumentou que no mes de xaneiro e de febreiro se foi "dobrando" o número de contratos indefinidos e expuxo que marzo van dar unha "gratísima sorpresa" por volver "multiplicar" as cifras. Neste sentido, afirmou que "se vai a visualizar" un mercado de traballo no que "a norma" sexa o contrato indefinido. En relación aos contratos fixos descontinuos, recoñeceu que é necesario un proceso de "adaptación" no que os traballadores de tempada, como o turismo, a agricultura ou a industria agroalimentaria, teñan "garantido" o seu posto de traballo na empresa.
