Encontros con Manuel Rivas e Ledicia Costas nas bibliotecas da Coruña
A Deputación organiza un novo club de lectura que amplía os horizontes das publicacións infantoxuvenís.
Por E.P. | SANTIAGO DE COMPOSTELA | 11/04/2022 | Actualizada ás 15:10
A Deputación da Coruña anunciou a posta en marcha dun novo club de lectura, o 'Club da Raíña Lupa', que nace ao amparo do Premio Raíña Lupa de literatura infantil e xuvenil da institución provincial. Un club que parte da premisa de que "non hai idade, hai literatura" para estender e socializar a idea de que a literatura infantil e xuvenil vai máis aló dese público en concreto.
Así, o venres 29 de abril celebrarase a primeira sesión na Sala César Antonio Molina da Biblioteca provincial da Coruña, ás 18,00 horas, co escritor Antonio Manuel Fraga, encargado de inaugurar esta rede de encontros co público lector. A iniciativa continuará os últimos venres dos meses de maio, setembro, outubro e novembro, á mesma hora e no mesmo lugar.
Este proxecto está coordinado pola gañadora da última edición do Premio Raíña Lupa, Andrea Maceiras, e participarán destacadas autoras e autores da literatura infantil e xuvenil en galego como Ledicia Costas, Manuel Rivas, Érica Esmorís, Antonio Manuel Fraga ou Berta Dávila.
Para participar no club será necesario anotarse previamente a partir do 18 de abril a través dun correo electrónico, que se fará público o día de apertura da inscrición. Iso se, o número de prazas estará limitado a 20 persoas e poderá participar tanto o público máis novo como calquera persoa adulta que desexe compartir experiencia lectora cos máis novos.
