O TSXG apercibe á Xunta por abusar da contratación temporal "fraudulenta"
O tribunal obriga a considerar fixa a unha traballadora que encadeou 14 anos de contratos temporais no persoal antiincendios. Precisamente, os traballadores forestais levan anos denunciando que a política de 'ETT' da Xunta incrementa o risco de sufrir grandes lumes.
- Protestas dos bombeiros forestais municipais contra a "precariedade sistemática" e reclaman melloras á Xunta
- Persoal fixo-discontinuo contra o lume: “Se non nos moviamos nós, non o facía ninguén”
- Listas de contratación do SERGAS, "hoxe en día é como apuntarte a unha ETT"
Por Europa Press / Redacción | SANTIAGO DE COMPOSTELA | 13/04/2022 | Actualizada ás 14:24
O Xulgado do Social número 2 de Lugo recoñeceu como persoal laboral fixo da Consellería do Medio Rural a unha traballadora que encadeou 14 anos de contratos temporais, entre 2006 e 2020, na categoría de emisorista contra incendios forestais. Na sentenza, con data de 25 de marzo de 2022, a xuíza entende que a empregada, defendida pola avogada de CC.OO. Teresa Burgo, superara un proceso selectivo en decembro do ano 2002 para acceder á categoría de emisorista como laboral fixo da Xunta, a pesar de que a Consellería non achegou durante o proceso xudicial a documentación sobre a puntuación que obtivo naquela oposición.
Aínda que á traballadora non se lle adxudicou ningunha das 102 prazas ofertadas en 2002, tal e como reflicte o fallo, si consta "acreditado que ocupou a mesma praza no Distrito Forestal Terra de Lemos desde o ano 2006".
Así, a xuíza afirma a continuación que "a ocupación dunha praza de forma prolongada no tempo (...) evidencia que dita praza estaba vacante no momento da convocatoria do proceso selectivo e se non incluíu na oferta de emprego público do ano 2002 é por vontade da propia demandada", é dicir, a Consellería, a cal "non acreditou" os motivos desta decisión.
Devandito isto, a titular do Xulgado do Social número 2 de Lugo afea á Xunta na sentenza que "non pode admitirse" que un traballador que superou o proceso selectivo "estea a ocupar unha praza de forma ininterrompida en virtude dun contrato temporal" cando este posto "estaba vacante" no momento de celebración da oposición.
"Non se comprende cal é o motivo polo que a entidade demandada (a Consellería) non oferta na OPE todas as prazas vacantes no momento da convocatoria e acuda de forma abusiva á contratación fraudulenta para a cobertura da devandita praza de forma continuada", critica a continuación a xuíza.
Por iso, a sentenza estima a demanda da traballadora contra Medio Rural e declara que ostenta a condición de persoal laboral fixo da Administración autonómica desde o 6 de xullo do 2006. sindicato CC.OO. celebra nun comunicado esta resolución xudicial que apunta á "contratación fraudulenta nas administracións públicas" e que "acolle o criterio fixado polo Tribunal Supremo" para sancionar á Xunta ao decretar a fijeza da relación laboral nestes supostos.
