Rapaces e rapazas de Arzúa 'arqueólogos por un día'
O Departamento de Cultura do Concello de Arzúa organiza esta primeira semana de maio unha interesante actividade divulgativa para o alumnado que os introducirá por unhas horas na ciencia da arqueoloxía.
Por Galicia Confidencial | Arzúa | 04/05/2022 | Actualizada ás 09:35
'Arqueocampo' trátase dunha actividade de divulgación cientíca dirixida ao público escolar que permite ás e aos participantes converterse en arqueólogos por unhas horas a través dunha simulación do traballo que desenvolve o Instituto de Ciencias do Patrimonio.
Esta acción permite vivenciar todas as fases da cadea de traballo arqueolóxico, permitindo realizar unha investigación a través de actividades prácticas e dinámicas e seguindo unha metodoloxía arqueolóxica. Os pequenos e as pequenas coñecerán de primeira man o traballo de escavación, a manipulación de materiais e a experimentación de procesos científicos.
A actividade comezou o pasado luns, 2 de maio, no Multiusos Terra do Queixo, espazo que acolle en horario lectivo un total de 20 grupos durante toda a semana. Nesta iniciativa participa o alumnado de 4º de Primaria a 2º da ESO do CEIP de Arzúa, IES de Arzúa e Colexio Nosa. Sra. do Rosario.
EXPERTOS NA MATERIA
A actividade conta coa guía de monitores e arqueólogos expertos e empréganse as ferramentas e os procedementos propios dunha escavación real (paletíns, cubos, vasoiras, etc.). Seguindo a metodoloxía arqueolóxica rexístranse as estruturas, fotográfanse pezas e mostras, recóllense e clasifícanse en bolsas co seu correspondente código, etc.
A Concelleira de Cultura e Educación do Concello de Arzúa, Aurora Varela, confía no “éxito dunha actividade que achega a ciencia e a arqueoloxía ás novas xeracións noutra iniciativa máis do Concello en colaboración cos centros educativos da vila”.
