Lanzan unha campaña para "situar as persoas maiores no centro do desenvolvemento tecnolóxico"
Profesionais da enxeñería recomendan a este colectivo ir "paso a paso" para avanzar no uso da tecnoloxía e "sen ter medo".
Por E.P. | SANTIAGO DE COMPOSTELA | 10/05/2022 | Actualizada ás 11:53
O Colexio Profesional de Enxeñaría en Informática de Galicia (Cpeig) reivindicará o vindeiro martes, no Día de Internet, a democratización do acceso á rede das persoas maiores. Este día dedícase nesta ocasión ás "tecnoloxías dixitais para as persoas maiores e o envellecemento saudable".
O presidente do colexio, Fernando Suárez, explicou nunha nota de prensa que as persoas maiores constitúen un segmento moi heteroxéneo e cada vez máis numeroso en Europa. Neste sentido, concretou que en España o 20% da poboación son maiores, e en Galicia supérase esta porcentaxe.
Así, nesta tesitura, Suárez considerou que o uso das tecnoloxías no colectivo das persoas maiores é un elemento "transversal e vertebrador", cada vez máis relevante para a súa vida diaria que a axuda a "estar presentes e ser partícipes na sociedade, a exercer os seus dereitos, a evitar a aparición da soidade non desexada e a envellecer de forma máis saudable".
En todo caso, Fernando Suárez apuntou que a sociedade está inmersa nunha "transformación dixital acelerada", con dispositivos, servizos e tecnoloxías que non están adaptados ao colectivo de maiores e que impiden que poidan facer uso de servizos ou reivindicar os seus dereitos en igualdade de condicións que o resto.
Neste sentido, demandou que se se quere aproveitar o potencial destes avances e maximizar a súa "potencia democratizadora" hai que "promover, incentivar e defender" que os servizos tecnolóxicos sexan accesibles para todas as persoas, "sen barreiras", para que "a calquera persoa maior se lle proporcionen as mesmas facilidades que ao resto da poboación".
"Só unha perspectiva integradora e global contribuirá a que toda a cidadanía poidamos aproveitar a informática para garantir o desenvolvemento persoal, a mellora da vida diaria, así como un envellecemento máis enriquecedor", reafirmou.
CAMPAÑA #CAMINAENGALICIA
Para isto, o Cpeig anunciou que este ano levará a cabo acciones destinadas a potenciar a importancia do talento e a experiencia sénior para darlles cabida na sociedade, buscando fórmulas, a través da informática, para que as persoas maiores poidan seguir achegando talento e experiencia. "Situar as persoas maiores no centro do desenvolvemento tecnolóxico faranos mellores como sociedade", manifestou.
Unha destas actividades é #CaminaenDigital, unha acción colaborativa na que 75 persoas maiores de sete Centros de Competencias Dixitais de Galicia aprenden destrezas dixitais e actívanse fisicamente sumando pasos nas súas contornas para realizar o Camiño de Santiago de forma virtual e sumar 764 quilómetros.
Así, camiñan día a día polas súas proximidades, sacan fotos, gravan vídeos e rexistran e comparten estas experiencias a través da páxina web caminaendigital.com, do espazo na rede social Facebook Camiña En Dixital, no que as imaxes e vídeos con máis 'Gústame' levan premio.
Nesta mesma liña, Fernando Suárez recomenda ás persoas maiores ir "paso a paso" para avanzar no uso da tecnoloxía, "sen ter medo" e a vez asumir que vai ser "un proceso de aprendizaxe lento".
