Baltar critica "o silencio" do Goberno central para abordar a xestión dos fondos europeos cos concellos e deputacións

O presidente da Deputación de Ourense, Manuel Baltar, considerou unha "falta de consideración" o "silencio" do Goberno central fronte á petición da Federación Española de Municipios e Provincias (FEMP) de abordar a xestión dos fondos europeos.

Baltar participou este martes en Madrid na reunión da xunta de goberno da FEMP que, conforme indicou a deputación, reclamou ao Executivo central a urxente convocatoria da Comisión Nacional de Administracións locais, co fin de abordar, entre outras cuestións, os problemas que causan "os axustados prazos para a execución dos fondos europeos Next Generation".

Segundo sinalou Baltar, trátase dunha reunión xa solicitada desde hai meses pero que só obtivo "silencio como resposta", o que ve como unha "falta de consideración non só coa propia federación, senón tamén, e aínda máis importante, con todo o mundo local español".

A institución provincial sinalou que concellos e deputacións expresaron na reunión a súa preocupación polos problemas que teñen á hora de executar proxectos financiados cos fondos europeos de recuperación, debido principalmente ás dificultades coas que se atopan para o cumprimento duns prazos moi axustados. "Unha circunstancia que require de solucións inmediatas, como a habilitación de prórrogas, para evitar que se teñan que devolver eses fondos", advirte Baltar.

O presidente do goberno provincial tamén reclama a inmediata convocatoria da Comisión Nacional de Administracións Locais (CNAL), porque quere que o Goberno perciba a preocupación destas institucións nunha reunión presencial, e non por carta.

"Os concellos", destaca Manuel Baltar, "están hoxe nunha situación de debilidade económica e o Goberno da nación debe ser sensible e cumprir coa súa obriga política e moral: reunirse co máximo órgano de goberno do mundo local español". Só deste xeito poderán coñecer "a situación de desamparo e incerteza dos concellos no que se refire a a xestión de fondos Next Generation".

Baltar pide un Executivo que saiba "dialogar e escoitar" actitudes fundamentais para ter en conta as necesidades reais dos veciños, engadindo que "non só falamos dos concellos máis poboados, senón dos menos habitados e con menos recursos, que son os que necesitan máis apoio das administracións".

A xunta de goberno da FEMP tamén esixe abordar nesta próxima reunión da CNAL a necesidade de compensar ás administracións locais pola perda recadatoria que supón para os gobernos locais a nova normativa do tributo das plusvalías.

Para esta reunión de traballo tamén expoñen os problemas derivados da suba de prezos de materiais en obras xa contratadas e diversas cuestións encadradas no financiamento local.