O plan de seca Galicia-Costa incorpora o escenario de situación excepcional por secura extraordinaria

O Goberno galego autorizou este xoves o acordo polo que se aproba o Plan de seca da Demarcación Galicia-Costa, co fin de ordenar e dar resposta aos períodos sen choiva e garantir o abastecemento de auga aos cidadáns.

Deste plan informou o presidente da Xunta, Alfonso Rueda, quen explicou que proporciona ás administracións os instrumentos xurídicos para facer fronte aos procesos de seca. Este plan actualiza o documento xa vixente, o cal permitiu xestionar episodios nos últimos anos.

O novo plan 2021-2027 presenta unha actualización que busca mellorar a eficacia e afrontar os retos futuros, como as consecuencias derivadas do cambio climático e a modificación dos réximes cambiantes de precipitacións.

A Demarcación Galicia Costa rexistra unha precipitación media anual de 1.500 mm, un valor moi elevado en relación ao resto da península, pero que experimentou episodios de escaseza de auga, froito da desigualdade da distribución temporal --antes máis sostidos no tempo--, nun contexto de cambio climático.

O plan propón unha xestión diferenciada das situacións de seca prolongada e de escaseza conxuntural. Así, a seca prolongada está relacionada coa diminución das precipitacións e das achegas en réxime natural, mentres que a escaseza conxuntural relaciónase coa problemática de atender a demanda de auga.

En relación á escaseza conxuntural, o plan establece distintos escenarios: normalidade, prealerta, alerta e emerxencia, sendo o primeiro deles o que non prevé ningunha medida, agás o seguimento, instalación de novos puntos de control ou a elaboración de partes hidrolóxicos.

No estado de prealerta identifícase o inicio da diminución dos recursos dispoñibles que pode supor un risco e poderanse aplicar medidas de aforro e control da demanda, como campañas de concienciación ou reutilización de augas residuais para usos urbanos, por exemplo.

O estado de alerta identifícase cunha intensificación na diminución dos recursos dispoñibles que evidencia "un claro risco" de imposibilidade de atender a demanda. Nese escenario reduciranse as dotacións para o abastecemento en alta e poderanse suspender preventivamente as concesións para usos privativos, por exemplo, xunto con outras medidas como a posibilidade de evacuar ictiofauna ante risco de mortalidade.

Mentres, o estado de emerxencia correspóndese co máximo grao de afección por diminución de recursos dispoñibles e as medidas poden incorporar incluso a suspensión temporal de autorizacións de verteduras e redución de abastecemento urbano e industrial, incluídos cortes temporais.

Como novidade con respecto ao anterior plan, o documento prevé a situación excepcional por seca extraordinaria, que poderá ocorrer cando nunha ou varias unidades territoriais se rexistre escaseza de alerta, que coincidan temporalmente co de seca prolongada ou escaseza en escenarios de emerxencia.