6,1 millóns de euros para potenciar as Illas Atlánticas no seu 20 aniversario como parque nacional

A conselleira de Medio Ambiente, Territorio e Vivenda, Ángeles Vázquez, confirmou este domingo que a Xunta de Galicia levará a cabo actuacións nas Illas Atlánticas con motivo do seu vixésimo ano como parque nacional. Para mellorar o "papel de referencia" das Illas Atlánticas respecto da protección do patrimonio natural, a Xunta investirá 6,1 millóns de euros.

Estes fondos irán destinados a medidas como a construción dunha nova rede de abastecemento de auga, a mellora da caseta de información para visitantes ou traballos de restauración e protección ambiental que se centrarán, sobre todo, no Castro das Hortas e na duna de Muxieiro.

Este financiamento foi exposto por Vázquez nas Illas Cíes durante o acto central da 'Semana por unha Galicia sostible', organizada para conmemorar o Día mundial do medio ambiente. Ademais da conselleira, tamén acudiron ao evento a delegada territorial da Xunta en Vigo, Marta Fernández-Tapias.

Por outra banda, Vázquez subliñou que os arquipélagos de Cíes, Ons, Sálvora e Cortegada consolidáronse como un "referente ambiental" a nivel internacional. Tamén indicou que estes arquipélagos son un dos principais reclamos dos visitantes que chegan a Galicia como rexistran os datos de afluencia.

Respecto diso, a conselleira considerou que as case 50.000 persoas que visitaron as Illas Atlánticas nos primeiros cinco meses do ano permiten prognosticar datos de visitantes previos á pandemia. Ademais, Vázquez lembrou o balance de turistas nos dous últimos anos no mesmo período, con 18.776 persoas en 2021 e, debido ao confinamento, os 2.332 visitantes de 2020.