Cobre San Rafael vende o seu proxecto como "referente europeo" con "80 melloras técnicas"
Nun comunicado engade que, tras analizar as razóns desta resolución e recollendo as demandas dos grupos de interese, o equipo técnico de Cobre San Rafael deseñou un novo proxecto en 2024 "que incorpora numerosas melloras significativas"
Por Europa Press / Redacción | SANTIAGO DE COMPOSTELA | 28/01/2025 | Actualizada ás 18:22
Cobre San Rafael deseñou un novo proxecto industrial mineiro para Touro-O Pino, o Proxecto Cobre San Rafael, "que quere ser un referente europeo incorporando máis de 80 melloras técnicas, ambientais e sociais, entre cambios e novos informes".
"En 2017, a compañía presentou a documentación necesaria para a actualización do proxecto para reactivar a produción de cobre en Touro e O Pino. Esta formulación inicial recibiu unha Declaración de Impacto Ambiental desfavorable en xaneiro de 2020, na que se requiría un maior detalle sobre determinados aspectos do proxecto", explica.
Nun comunicado engade que, tras analizar as razóns desta resolución e recollendo as demandas dos grupos de interese, o equipo técnico de Cobre San Rafael deseñou un novo proxecto en 2024 "que incorpora numerosas melloras significativas".
"Entre elas, un maior nivel de detalle técnico, novas medidas preventivas e correctoras, e a adaptación ao marco normativo actualizado, como o Plan Hidrolóxico 2021-2027 e a Lei Europea de Materias Primas Fundamentais, que se materializa no Regulamento (UE) 2024/1252"
"Ademais, Cobre San Rafael solicitou a declaración do novo proxecto como Proxecto Industrial Estratéxico, en virtude do Decreto Lexislativo 1/2015, destacando a súa contribución económica, social e ambiental. O 24 de xuño de 2024, a Xunta de Galicia aprobou esta solicitude, recoñecendo o carácter estratéxico da iniciativa", remarca.
O proxecto presentado por Cobre San Rafael en 2024 supón, indica, "unha renovación integral respecto da proposta inicial de 2017, tanto en termos técnicos como na incorporación de medidas de sustentabilidade e garantías ambientais".
"Un dos avances máis destacados é a mellora das medidas de protección para os recursos hídricos, especialmente relevantes no contexto do ZEC Ulla-Deza". "Fronte ao enfoque de 2017, que se centraba principalmente en cumprir cos estándares regulatorios da época, o novo proxecto incorpora ferramentas de prevención máis avanzadas e sistemas de control máis estritos para evitar calquera posible afección sobre a contorna natural, mesmo en circunstancias climáticas extremas".
"Adicionalmente, incorporáronse novos estudos e ampliado a documentación técnica, atendendo ás achegas dos grupos de interese, os condicionantes dos informes sectoriais previos e os cambios normativos", recalca a compañía.
