O TS avala que a Xunta non facilitase máscaras FFP2 ao persoal en centros de día e gardarías
Estima un recurso da Xunta e revoga ao alto tribunal galego, que dera a razón á a CIG.
Por E.P. | SANTIAGO DE COMPOSTELA | 07/06/2022 | Actualizada ás 17:58
O Tribunal Supremo avalou o protocolo aplicado durante a pandemia pola Xunta de Galicia, entón dirixida por Alberto Núñez Feijóo, para facer fronte ao coronavirus nas escolas infantís e os centros de día. Así, revogou a decisión do Tribunal Superior de Xustiza de Galicia (TSXG), que deu a razón en 2021 ao sindicato CIG e obrigou o Goberno autonómico a proporcionar máscaras FFP2 ao persoal destas instalacións.
En 27 folios, os maxistrados analizaron se o Consorcio Galego de Servizos de Igualdade e Benestar estaba obrigado a facilitar a todos os seus traballadores das escolas infantís e dos centros de día máscaras FFP2 para a protección das vías respiratorias fronte ao covid-19 ou se, pola contra, eran suficientes as medidas que viñan aplicando pola Xunta.
Segundo precisaron os xuíces, as medidas aplicadas polo Goberno dirixido por Feijóo consistían en fornecer ás traballadores pantallas e máscaras cirúrxicas; tomar a temperatura a todas as crianzas ao entrar na escola, e se non tiñan febre ou síntomas, eran admitidas durante esa xornada como persoas sas. Só se se detectaba algún síntoma eran illados de forma individual coa persoa responsable do devandito illamento, a quen se lle facilitaba entón máscara FFP2, ademais doutros elementos de protección.
Nunha sentenza de 18 de maio, á que tivo acceso Europa Press, a Sala do Social deu a razón á Xunta ao considerar que de ningunha norma legal se desprende a obrigación do Consorcio Galego de fornecer a todas as súas traballadores máscaras do tipo FFP2 para desempeñar as súas tarefas ordinarias nas escolas infantís e centros de días cando unicamente están en contacto con persoas asintomáticas.
A LEI NON ESPECIFICA O TIPO DE MÁSCARAS
Na resolución, da que foi relatora o maxistrado Sebastián Moralo, o tribunal lembrou que a Lei 2/2021, de 29 de marzo, de medidas urxentes de prevención, contención e coordinación para facer fronte á crise sanitaria ocasionada polo covid-19 "contén diferentes disposicións sobre o uso específico de máscaras e as obrigacións das empresas nos centros de traballo, en función, mesmo, do tipo de actividade desenvolvida".
O Supremo subliñou que esta lei obriga ás empregadoras a proporcionar ao persoal os equipos de protección "adecuados" ao nivel de risco, cando non sexa posible manter unha distancia de seguridade interpersoal mínima de 1,5 metros. Precisou, con todo, que a normativa non menciona a obrigación de facilitar un ou outro tipo concreto de máscara.
