O paro baixa en Galicia, un 0,39 %, por baixo da media estatal

O paro rexistrado nas oficinas dos servizos públicos de emprego baixou en 472 persoas en novembro en Galicia, un 0,39 % interanual, por baixo da media, ata situar o total en 121.742 desempregados, segundo os datos que publica este martes o Ministerio de Traballo e Economía Social. No conxunto estatal, reduciuse en 16.036 persoas en novembro en relación ao mes anterior (-0,6 %) grazas, sobre todo, ao sector servizos, que concentrou algo máis da metade do descenso do desemprego. Tras a baixada de novembro, o número total de desempregados situouse en 2.586.018 parados, a súa cifra máis baixa nun mes de novembro desde 2007, subliñou o Ministerio.

Pola súa banda, a Seguridade Social perdeu unha media de 2.255 cotizantes en novembro en Galicia respecto ao mes anterior (-0,21 %), un descenso algo superior ao da media (-0,1 %), segundo os datos que publica este martes o Ministerio de Inclusión, Seguridade Social e Migracións. O retroceso do paro en novembro deste ano é inferior ás caídas rexistradas nos meses de novembro de 2023 (-24.573 desempregados), 2022 (-33.512 parados) e 2021 (-74.381 desempregados), pero contrasta coas subidas de novembro de 2020 (+25.264 parados) e 2019 (+20.525 desempregados). Desde o inicio da serie histórica comparable en 1996, o paro subiu en novembro en 21 ocasións e baixou en oito. O maior repunte nun mes de novembro produciuse en 2008, con 171.243 parados máis, en plena crise financeira, mentres que o descenso máis pronunciado foi o de 2021 (-74.381 parados), coa volta á normalidade tras a pandemia.

XUNTA E GOBERNO

Neste sentido, a  Delegación do Goberno en Galicia viu nos datos do paro "un síntoma de esgotamento" das medidas da Xunta neste ámbito. Pola súa banda, o Executivo autonómico pon o foco no medio e o longo prazo para avaliar a evolución do desemprego. Pola súa banda, o conselleiro de Emprego, José González, resalta que Galicia rexistra a cifra de paro máis baixa nun mes de novembro desde que hai rexistros (1996) e celebra tamén que haxa 17.555 novas afiliacións á Seguridade Social en relación con novembro do ano pasado

SINDICATOS

Mentres, a CIG alerta de "falta de estabilidade laboral" e dun emprego que, en Galicia, e segundo os datos do paro feitos públicos este martes, "depende da estacionalidade". "O lixeiro descenso do desemprego vai acompañado dunha caída da afiliación á Seguridade Social", engade nun comunicado de prensa, antes de incidir nun "crecemento" da "pobreza laboral". Un mercado laboral, para a central nacionalista, "cada vez máis precario, con dentes de serra e dependente do emprego estacional e das necesidades dos diferentes sectores, sobre todo o de servizos".

Pola súa banda, UGT e CC.OO. consideran que Galicia presenta "máis dificultades" para crear emprego, ante o que reclaman melloras nas condicións laborais. Nisto último céntrase UGT, que subliña que "mellorar as condicións laborais incentiva o crecemento económico". Por iso, na súa opinión, é "o momento de seguir mellorando o mercado laboral para facelo máis eficiente e xusto". En concreto, solicita abordar "as cuestións pendentes" como a redución de xornada e a subida do salario mínimo interprofesional. Pola súa banda, CC.OO. insiste en demandar cambios nas políticas da Xunta para conseguir que o mercado laboral galego "se aproxime máis ao comportamento que experimenta noutras comunidades autónomas". E é que, segundo sinala, "a pesar de ser unha boa cifra, Galicia é a cuarta comunidade en que menos caeu o desemprego e sitúase moi lonxe da media estatal".

AUTÓNOMOS

Pola súa banda, a asociación galega de traballadores autónomos e do mar (Agtamar) aplaude que foi "un bo mes de novembro" para este réxime. Con todo, advirte de que, con esta evolución positiva, tamén crece o número dos denominados "falsos autónomos", unha das "principais problemáticas" do sistema.

PSdeG CRITICA A POLÍTICA ECONÓMICA DA XUNTA

O secretario de Economía e Emprego do PSdeG, Abel Losada, reprochou o modelo económico da Xunta ao que achaca o "fracaso" dos datos sobre o paro deste mes de novembro.

Tal e como trasladaron os socialistas nunha nota de prensa, a cifra de paro nacional descendeu en 0,62%, mentres que en Galicia é inferior e establécese nun 0,39%. Ante estes datos, o representante socialista expuxo que "reflicten un fracaso relativo importante, que se agrava ao considerar a peor evolución demográfica de Galicia".

Así, Abel Losada relacionou as políticas económicas "pouco ambiciosas e carentes de visión estratéxica" do Goberno galego co "insignificante" descenso de paro. Neste contexto, afirmou que na Xunta "non hai modelo produtivo definido" e que a súa estratexia se basea en "esperar a chegada de proxectos sen ningunha proactividad" pola súa banda.

Ademais, o socialista aproveitou para criticar a xestión dos fondos Next Generation por parte da Xunta, á que acusou de limitarse a "pór carteis publicitarios por toda a Comunidade mentres se descoñecen as estratexias, as formulacións e os obxectivos" para obter as axudas europeas.