A patronal galega pide axilizar a tramitación da mina de Touro que os empresarios galegos cualifican como "seguro"
O presidente da patronal galega, Juan Manuel Vieites, eclama que, toda vez consiga a declaración ambiental e os permisos, a súa tramitación sexa "o máis áxil posible", posto que foi declarado pola Xunta como estratéxico
Por E.P. | SANTIAGO DE COMPOSTELA | 04/12/2024 | Actualizada ás 18:31
O presidente da patronal galega, Juan Manuel Vieites, enxalza o proxecto de Cobre San Rafael para a mina de Touro-O Pino como "seguro, moderno, de calidade", xa que "cumpre, tal como di a Unión Europa, coa procura de equilibrar a explotación de recursos naturais coa protección ambiental".
Representantes de Cobre San Rafael reuníronse co presidente da Confederación de Empresarios de Galicia (CEG) para presentarlle o proxecto que está en exposición pública. Así, Vieites reclama que, toda vez consiga a declaración ambiental e os permisos, a súa tramitación sexa "o máis áxil posible", posto que foi declarado pola Xunta como estratéxico.
Nun comunicado conxunto de Cobre San Rafael e a Confederación de Empresarios de Galicia (CEG), Vieites sinala que esta iniciativa "pretende unha recuperación non só do aspecto mineiro, do metal, senón tamén do aspecto ambiental". "É dicir, falamos de recuperación e aproveitamento", agrega.
Por parte de Cobre San Rafael, Pablo Núñez, responsable de relacións institucionais, destaca que "o compromiso coa rexión foi sempre unha prioridade na conceptualización do proxecto". Nos últimos anos, mantiveron máis de 200 reunións con diversos axentes, entre os que a CEG é "fundamental" de face a "un proxecto de consenso co obxectivo de xerar o maior impacto positivo para as persoas e empresas", engade Pedro Cuervo, director de servizos técnicos da compañía.
